Балаева Әлия Молдағұлова туралы фильмнің түсірілімі тоқтағаны туралы ақпаратқа жауап берді

Мәдениет және ақпарат министрі Аида Балаева аты аңызға айналған мерген Әлия Молдағұловаға арналған "Әлия" фильмінің түсірілімі не себепті тоқтағанын айтты. Бұл туралы KAZ.NUR.KZ министрдің Facebook желісіндегі парақшасына сілтеме жасап хабарлайды.

Министр жазбасында "Әлия" көркем фильмінің түсірілімінің тоқтатылуына байланысты БАҚ-та бұрын жарияланған материалдарға түсініктеме берді.

"Біріншіден, Әлия Молдағұлованың ерлігін бәріміз жадымызда ұстайтынымызды атап өткім келеді. Оның тарихы ұлттық жадымыздың ажырамас бөлігі және министрлік батыр қыздың ерлігіне арналған фильмнің үлкен экранға шығуына мүдделі.

"Әлия" фильмі біз үшін басты фильмдердің бірі болып қала береді. Бұл жалпы бюджеті 900 млн теңгеден асатын ауқымды жоба, оның 450 млн теңгесі жеке инвестиция, ал қалған соманы кинокомпания мемлекеттік бюджеттен алуды жоспарлаған", - деді министр.

Балаеваның айтуынша, биыл маусым айында фильм түсіруді жоспарлап отырған ұжым, Ұлттық кинематографияны қолдау мемлекеттік орталығы ұйымдастырған питчинг іс-шарасына қатысқан. Онда мемлекеттік қолдауға өтініш білдірген фильмнің сценарийі таныстырылды. Ведомствоаралық комиссия отырысының қорытындысы бойынша 18 жоба, оның ішінде "Әлия" фильмі қаржыландыруға ұсынылды.

"Әлия Молдағұлованы еске алу жауапкершілік жоғары екенін және фильмнің қазақстандық көрермен үшін маңыздылығын ескере отырып, кинокомпания мемлекет қаржысын ұтымсыз пайдалануды болдырмау үшін байқауға қатысуды тоқтату туралы шешім қабылдады.

Бұл шешім жобаны іске асыруды кейінге қалдыру мүмкін деген қауіпке байланысты болды, өйткені түсірілімнің негізгі бөлігі Беларусь Республикасының аумағында жоспарланған, онда әскери қимылдар сахнасын түсіру жоспарланған", - делінген хабарламада.

Беларусь Республикасы қазір басқа жобалардың, негізінен ресейлік жобалардың жүктемесі жоғары болғандықтан, қажетті алаңдарымен қамтамасыз ете алмай отыр.

"Осы себепті толық көлемде декорацияны пайдалану кестесін келісу мүмкін болмады, кейін жобаның мерзімін өткізіп алу және уақытында аяқталмау қаупі туындады. Осыған байланысты Шығыс Қазақстан облысындағы алаңдарда құру туралы шешім шығарылды. Бұл түсірілім сапасын сақтап қана қоймай, фильмнің уақытында түсіруілін қамтамасыз етеді.

Мұндай шаралар көрермен үмітін ақтайтын және ұлы қаһарман қызды еске алуға лайық фильм түсіруге септігін тигізетініне сенімдіміз", - деді Аида Балаева.

Ол жобаны қаржыландыруда ешқандай мәселе жоғын атап өтті.