"Астанаға Кенесары ханның қылышын апарамыз": Түркістан облысының мұражайы көшпенділер ойындарына қатысады

8-14 қыркүйек аралығында Астанада V Дүниежүзілік көшпенділер ойындары өтеді. Осы ауқымды шара аясында этнографиялық көрме ұйымдастырылады. Түркістан облыстық тарихи-мәдени мұражайы да өз үлесін қоспақ, деп хабарлайды KAZ.NUR.KZ Yujanka.kz-ке сілтеме жасап.

Жақын күндері мұражай мамандары елордаға он екі қанат киіз үйді барлық жиһаздарымен жеткізіп бермек.

Мұражай қорының бас сақтаушысы Айгүл Төлендиеваның айтуынша, келушілер қазақ қолөнершілерінің қолынан шыққан көне сандықтарды, ағаш төсекті, фарфор тостағандарды сақтауға арналған арнайы сөмкелерді – теркеш, кесеқапты тамашалай алады.

"Мұражай қорында 82 мыңнан астам құнды жәдігер бар. Астанадағы көрмеге қазақ халқының патшалық Ресейге, Қоқан, Хиуа хандықтарына қарсы ұлт-азаттық қозғалысының қолбасшысы болған Кенесары ханның қылышын апарамыз. Бұл – немересі Әзімхан Кенесариннің сыйы", - дейді Айгүл Төлендиева.

Қылыш иілген, жүзі дөңес жағында, ұңғысы ойыс жағында. Қылыш темір мен сүйектен жасалған. Жүзінің ұзындығы – 70 сантиметр, сабының ұзындығы – 15. Сондай-ақ келушілер XX ғасырдың бас кезінде күмістен жасалған әсем әшекей бұйымдарды, қазақтың ұлттық киімдерін тамашалай алады.

Көрмеге былғарыдан жасалған ыдыс – торсық қойылады. Оған қымыз бен айран, сондай-ақ сусындар емдік қасиетін жоғалтпай сақталады. Суретші-реставратор Римма Рақымбаева былғары ыдыстарды өңдеудің ежелгі әдісін қолданып жүр, яғни оларға қойдың майын жағады. Осылайша, ыдыс кеуіп кетпейді, серпімді болады, жарылып кетпейді және әдемі жылтырап тұрады. Бұрын қалпына келтірушілер вазелин мен глицеринді пайдаланған. Ал қазір тек қойдың майын қолданады. Айырмашылығы үлкен. Май теріні жұмсартып қана қоймай, жағымсыз факторлардан жақсы қорғайды. Ыдысқа май жағылып, бірнеше күн бойы сіңірілуге ​​қалдырылады.