АҚШ пен Қытай азаматтарына қоңырау шалған: Алматыда алаяқтықпен айналысқан call-орталықтар анықталды

Алматыда ІІМ киберқылмысқа қарсы күрес бөлімшесінің қызметкерлері алаяқтықпен айналысқан төрт Call-орталықтардың қызметін тоқтатты. Бұл туралы KAZ.NUR.KZ ведомствоға сілтеме жасап хабарлайды.

Ведомство ақпаратынша, аталған call-орталықтар арқылы Иран, Үндістан, Қытай, АҚШ және Малайзия азаматтарына қоңырау шалынған.

Осылайша, адамдар жалған инвестициялық мәмілелерге алданып қалған. Мұндай 2 мыңнан астам қоңырау жасалған.

Полиция мәліметінше, нәтижесінде 47 шетелдік, 5 Қазақстан азаматы ұсталды. Тінту барысында 1500-ден астам телефон, 57 ноутбук пен компьютер, 1000-нан астам SIM-карта тәркіленді.

Ұсталғандардың қазақстандықтарға қатысты интернет-алаяқтыққа қатысы бар-жоғы тексеріліп жатыр. Тергеу шаралары жалғасуда.