"Ұлының оқу ақысын төлеуге нұсқау берген": Қызылорда облысында лауазымды шенеунік сотталды

Қызылорда қалалық соты облыстық кәсіпкерлік және өнеркәсіп басқармасының басшысына қатысты үкім шығарды. Оған 9 ай бас бостандығынан айыру түріндегі жаза тағайындалды, деп хабарлайды KAZ.NUR.KZ Антикорға сілтеме жасап.

"Ол бизнес өкілдеріне ұлының оқуына 1,4 млн теңге сомасында ақы төлеу және құны 6,8 млн теңге дизель отынын беру қажеттігі туралы заңсыз нұсқаулар беру арқылы лауазымдық өкілеттіктерін асыра пайдаланғаны үшін кінәлі деп танылды", - делінген хабарламада.

Бұдан басқа, шенеунік өңір кәсіпорындарының сұйытылған газдың тиісті көлемін алу құқығын шектеу арқылы бизнес субъектілеріне 26,9 млн теңге сомасында залал келтіре отыра заңды кәсіпкерлік қызметпен айналысуға кедергі жасағаны үшін сотталды.

Сот үкімімен Д. Әбсаттаровқа мемлекеттік қызметте және квазимемлекеттік сектор субъектілерінде лауазымдарды атқару құқығынан өмір бойына айыра отырып, 9 ай бас бостандығынан айыру түріндегі жаза тағайындалды, сондай-ақ мемлекеттік награда "Ерен еңбегі үшін" медалінен айыру туралы ұсыныс енгізілген.

Үкім заңды күшіне енді.