Ұрлық, бопсалау, кісі өлтіруге оқталу: ІІМ Ұлытау облысында қылмыстық топтарды құрықтады

ІМ Ұлытау облысында қылмыстық топтарды құрықтады. Кейінгі айларда Ұлытау облысында осындай бірнеше топтыұстау жүзеге асырылды, деп хабарлайды ІІМ-нің ақпараттық медиа-порталына сілтеме жасап.

"Ұйымдасқан қылмысқа қарсы күрес бөлінісінің қызметкерлері “Қазақмыс корпорациясы” ЖШС қауіпсіздік қызметімен бірлесіп, қымбат металл қорытпаларын ұрлауды жолға қойған қылмыстық топ әрекетінің жолын кесті. Топқа аталған кәсіпорынның қызметкерлері де кірген. Күдіктілер кәсіпорыннан 6,5 млн теңге өнімін ұрлау кезінде ұсталды. Қазіргі уақытта олардың басқа қылмыстарға қатысы бар-жоғы тексерілуде", - деді ІІМ ұйымдасқан қылмысқа қарсы күрес департаментінің басқарма бастығы Қуандық Алпыс.

Сондай-ақ Қуандық Алпыстың сөзінше, полиция 2022 жылдың наурыз айында жергілікті кәсіпкерден 20 млн теңге бопсалаған тағы бір топ мүшелерін құрықтады. Жәбірленушіні жалдамалы пәтерге алдап алып келіп, физикалық күш қолданып, қару-жарақпен қорқыту арқылы ақша талап еткен. Сонымен қатар 2018 жылы орын алған жергілікті тұрғынды өлтіруге оқталу әрекеті әшкереленді. Жергілікті криминалитеттен құралған қылмыстық топ анықталды. Оған қатысушылар қазіргі уақытта басқа қылмыстар жасағаны үшін жазасын өтеп жатыр. Кісі өлтіруге оқталу әрекеті жасалған тапанша тәркіленді.

"Көрсетілген фактілер бойынша барлығы 17 адам ұсталып, ішкі істер органдарына жеткізілді. 20-дан астам тінту шаралары өткізілді, нәтижесінде 5 атыс қаруы, оқ-дәрілер, пышақтар және экстремистік сипаттағы діни әдебиеттер тәркіленді. Барлық факті бойынша сотқа дейінгі тергеу жүргізілуде. Өңірлерде қылмыстық топтардың қызметіне жол бермеу жұмыстары жалғасып жатыр", - деді ІІМ ұйымдасқан қылмысқа қарсы күрес департаментінің басқарма бастығы Қуандық Алпыс.