Қарағанды облысындағы өрт аумағы жеті есе ұлғайды

Қарағанды ​​облысындағы өрт аумағы жеті есеге ұлғайып, бір тәулікте 21 мың гектарға жетті. Бұл туралы KAZ.NUR.KZ Қарағанды облыстық ТЖД өкілдеріне сілтеме жасап хабарлайды.

Сағат 15.00-дегі жағдай бойынша өрт аумағы – 21 000 га.

"Өртті сөндіруге барлығы 401 адам, ТЖД-ның 68 техникасы, үш ұшқышсыз ұшатын аппараты және екі МИ-8 тікұшағы жұмылдырылды", - деді Қарағанды ​​облысының Төтенше жағдайлар департаментінің баспасөз қызметі өкілдері.

Айта кетейік, 6 қазанда Қазақстанның екі өңірінде ірі өрт болып жатқанын хабарлаған едік. Кейінірек Қарағанды облысында дала өртін сөндіру кезінде өрт сөндіруші қаза тапқаны белгілі болды.

Ал бүгін Қарағанды облысының Денсаулық сақтау басқармасы өкілдері дала өртін сөндіру кезінде күйік шалған 4 өрт сөндірушінің жағдайына қатысты мәлімдеме жасады.

Сонымен қатар Павлодар облысында Қарағанды облысынан Баянауыл мемлекеттік ұлттық табиғи паркінің ормансыз аумағына өткен дала өртін сөндіру жалғасып жатқаны белгілі болды. Облыста өрт шалған жердің ауданы шамамен 6 мың гектарға жеткені хабарланды.