Соттан жалтарған шетелдік Қазақстанда аспаз болып жұмыс істеген

Талдықорғанда өткен жылдың соңынан бері мемлекетаралық іздеуде жүрген шетел азаматы ұсталды. Ол Өзбекстанға экстрадицияланады, деп хабарлайды Жетісу облыстық полиция департаментіне сілтеме жасаған KAZ.NUR.KZ.

Жетісу облысы Полиция департаменті Экстремизмге қарсы іс-қимыл басқармасының қызметкерлері ІІМ Экстремизмге қарсы іс-қимыл департаментінің және ҚАЖК-нің үйлестіруімен мемлекетаралық іздеуде жүрген Өзбекстан Республикасының азаматын ұстады.

"Ұсталған ер адам – Өзбекстан Республикасының Қылмыстық кодексіне сәйкес иемдену немесе жымқыру арқылы ұрлық жасады деген айыппен өз елінде іздеуде жүрген 20 жастағы жігіт. Ер адамға 2023 жылғы 29 желтоқсанда Ташкент облысының Бас ішкі істер басқармасы іздеу жариялаған", - делінген хабарда.

Ведомство мәліметінше, іздеу басталғаны туралы білген соң, ол Өзбекстаннан кетіп, Қазақстанға келген, Шымкент қаласында жасырынып, наубайшы болып жұмысқа орналасуға шешім қабылдаған. Алайда, көп ұзамай, 2024 жылы ол Талдықорғанға көшіп келіп, аспаздың көмекшісі болып жұмысқа орналасқан.

Облыстық полиция департаменті өкілдері жариялаған жедел деректер бойынша іздеуде жүрген ер адам Талдықорғанда ұсталып, қамауға алынды. Қазіргі уақытта мүдделі мемлекеттік органдармен бірлесіп, оны Өзбекстанға экстрадициялау туралы мәселе қаралып жатыр, онда ол сот алдында жауап береді.