"Кемшіліктер анықталды": Досаев Алматы әуежайындағы жаңа терминалдың жұмысы туралы айтты (фото)

Алматы әкімі Ерболат Досаев Халықаралық әуежайдың қызметі мен туындаған мәселелерге қатысты кеңес өткізді. Бұл туралы KAZ.NUR.KZ Алматы қаласы әкімдігі баспасөз қызметіне сілтеме жасап хабарлайды.

Ведомство өкілдерінің мәлімдеуінше, Алматы әкімі Ерболат Досаев пен TAV Airports Holding бас директоры Серкан Каптан Алматы халықаралық әуежайының қазіргі мәселелері мен оны дамыту жоспарларын талқылады.

Кездесу барысында Алматы әкімі Ерболат Досаев жаңа терминалдың жоспарланған мерзімнен екі ай бұрын, яғни 2024 жылғы 1 маусымда ашылғанын және ол жолаушылардың жайлылығы мен қызмет көрсету деңгейін айтарлықтай арттыруға тиіс болғанын атап өтті.

"Алайда ашылғаннан кейін терминалдың дренаж жүйесінің істен шығуы, эскалаторлардың дұрыс жұмыс істемеуі, жүк беру кезінде кідірістер, қабырғадағы жарықтар және т.б. кемшіліктер анықталды.

Қала басшысы бұл кемшіліктер жолаушылардың наразылығын тудырғанын атап, жағдайды түзету бойынша қабылданған шараларды талқылауды ұсынды", - делінген хабарламада.

TAV Airports Holding бас директоры Серкан Каптан әуежай бірқатар қиындыққа тап болғанын және оларды шешу үшін кешенді тәсіл қажет екенін айтты. Ол жаңа терминалдағы бұрын анықталған кемшіліктер толығымен жойылғанын хабарлады. Қазіргі уақытта дренаж жүйесін қалпына келтіру және оны қалалық желілерге қосу жұмыстары аяқталып келеді, ішкі терминалды қайта құру – тіркеу аймақтарын, күту залдарын және жүк беру аймақтарын кеңейту, телетраптарды ауыстыру жұмыстары қолға алынған.

Сонымен қатар Серкан Каптан жолаушылардың қауіпсіздігі мен жайлылығын арттыруға бағытталған жоспарын да жеткізді, олардың ішінде сол жақ ұшу-қону жолағын толық қайта құру, перрондарды және мұзға қарсы алаңды жаңарту, аэродром жабдықтарын жаңарту, дренаж жүйесіндегі мәселелерді шешу және тағы басқа шаралар бар.

Кеңес барысында көлік инфрақұрылымы түйткілі де талқыланды. Әуежайдағы автотұрақ орындары мен кіреберіс жолдағы қиындықтар белгілі бір қиындық туғызады. Қарбалас сәтте әуежайға кіру 45 минутқа дейін уақыт алуы мүмкін, бұл қолданыстағы жол инфрақұрылымын қайта қарауды талап етеді. Қазіргі уақытта әуежайда 551 орындық 3 тұрақ аймағы ашылды. Алдағы уақытта осы мәселені шешу үшін инвестор 1000 орынды көпқабатты автотұрақ салуды жоспарлап отыр.

Кездесу соңында тараптар Алматы халықаралық әуежайының сапалы жұмыс істеуін қамтамасыз ету үшін тығыз ынтымақтастыққа және қажетті іс-шараларды іске асыруға дайын екенін мәлімдеді.