Ақтөбедегі спорт мектептерінің басшылары бюджет қаражатын букмекерлік кеңселерде жұмсаған

Ақтөбе облысы прокуратурасымен балалар мен жасөспірімдер спорт мектептерінің басшылары бюджетке түсуге жататын спорт алаңдары мен залдарды жалға беру қызметі үшін, әуесқой спорт командаларынан алынған қаражатты негізсіз жымқырғаны анықталды. Бұл туралы KAZ.NUR.KZ Ақтөбе облысы прокуратурасына сілтеме жсап хабарлайды.

Қадағалау органы мәліметінше, соңғы 3 жылда Ақтөбе облысында кәсіби клубтарды дамытуға арналған шығыстар 2 есеге ұлғайтылған, облыстан республикалық және халықаралық жарыстарға дайындалуға және қатысуға бюджеттен 13 млрд теңгеден астам қаржы бөлінген.

Спорт мектептерінің басшылары 6 млн теңгеден астам бюджет қаражаттары заңсыз жұмсаған.

Бұл қаражаттар мектеп басшыларымен өз қажеттіліктеріне, соның ішінде букмекерлік кеңселердегі ставкаларға жұмсалған.

Сонымен қатар "Ақтөбе" футбол клубы командасының ұшуы бойынша әуе қызметтерін 165 млн теңгеден астам көтерілген бағамен бірнеше делдал арқылы сатып алу фактілері анықталды.

Барлық фактілер бойынша прокуратурада Қылмыстық кодекстің 189-бабының 4-бөлігімен (Сенiп тапсырылған бөтен мүлiктi иемденiп алу немесе талан-таражға салу) 3 сотқа дейінгі тергеп-тексеру басталды.

Сонымен қатар тексеру нәтижелері Ақтөбе облысының заңдылықты, құқықтық тәртіпті және қылмысқа қарсы күресті қамтамасыз ету жөніндегі үйлестіру кеңесінің отырысында қаралып, жауапты мемлекеттік органдарға бұқаралық спортты қаржыландыру жағдайын түзету, бюджет қаражатын мақсатты және тиімді пайдалану тапсырылды.