Астанада таныс қызын соққыға жыққан ер адам қамауға алынды

Таныс қызын ұрып-соққан 27 жастағы ер адам сот алдына келді. Бұған дейін ол жәбірленушіге бейәдеп сөздер айтқаны үшін әкімшілік жауапқа тартылып, 10 тәулікке қамауға алынған. Бұл туралы KAZ.NUR.KZ Астана қаласы прокуратурасына сілтеме жасап хабарлайды.

27 жастағы жігіттің таныс қызын ұрып-соғуына қатысты ісі сотта қаралды. Құқық бұзушының жәбірленушіге қатысты балағат сөздер айтқаны үшін бұрын әкімшілік жауаптылыққа тартылғаны анықталды.

"Сотталушы Қылмыстық кодекстің 109-1-бабы "Ұрып-соғу" бойынша кінәлі деп танылып, 10 тәулікке қамауға алынды. Қазіргі таңда үкім заңды күшіне енді. Астана қаласының прокуратурасы денсаулыққа жеңіл зиян келтіру және ұрып-соғу қылмыстық құқық бұзушылық қатарына көшкені туралы еске салады. Денсаулыққа қасақана жеңіл зиян келтіргені үшін 2 жылға дейін бас бостандығынан айыру жазасы көзделген.

Тәніне зақым келтіріп, бірақ денсаулыққа жеңіл зиян келтіруге алып келмеген ұрып-соғу немесе өзге де зорлық-зомбылық әрекеттерін жасау 50 тәулікке дейін қамауға алу түріндегі қылмыстық жауаптылыққа әкеп соғады", - делінген хабарламада.

Астана қаласы прокуратурасы биыл денсаулыққа жеңіл зиян келтіру және ұрып-соғуға байланысты құқықбұзушылықтар бойынша қылмыстық заңнамаға өзгерістер енгізілгенін еске салды.

Осы жылдың өткен кезеңінде аталған қылмыстарды жасағаны үшін 34 адам сотталды, оның ішінде: 20-қоғамдық жұмысқа, 9-айыппұл салынды, 3-қамауға алынды, 2-бас бостандығын шектеу түріндегі жазаға тартылды.