Павлодарда бір ғасырға жуық тұрған көне ескерткіш құлап қалды

Павлодарда 7 қарашадан 8 қарашаға қараған түні "Балалық шақ" саябағында қатты дауыл салдарынан шырша құлап, Ленин ескерткіші қирады. Ол қалпына келтіруге жарамайды, деп хабарлайды pavlodarnews.kz

Лениннің бұл ескерткіші 1928 жылы 1 шілдеде Астана-Толстой көшелерінің қиылысындағы бұрын "Казак алаңы" деп аталған жерде ашылған.

"Ескерткіштің тұрғанына 100 жылға таяп қалған еді. Оның қасында 67 жыл өскен ағаш бұрындары отырғызылған төрт шыршадан аман қалған жалғыз шырша болатын. Қазіргі уақытта құлаған ағашты кесу және тазалау жұмыстары аяқталды. Келесі аптада тұғыр бөлшектеледі. 1928 жылы Араб әрпімен жазылған бірегей жазуы бар тақта сақталады. Алдағы уақытта жұртшылықпен жан-жақты талқыланып, бұл жерде не орналасатыны туралы шешім қабылданатын болады", - деді қала әкімінің орынбасары Светлана Гладышева. 

Оның айтуынша, соңғы рет ескерткішті қайта құру 2022 жылы жеке инвесторлардың есебінен жүргізілді.

"Қазірдің өзінде, біз сол жерде іргетастың жойылғанын көрдік. Яғни негізгі металл корпустың бірнеше ақаулары болған. Сондықтан құрылым ауа райына төтеп бере алмай, мұндай жағдай орын алды", - деді Светлана Гладышева.