Шымкентте биыл қар тазалау жұмыстарына 189 арнайы техника жұмылдырылмақ

Шымкент қаласының қысқы маусымға дайындығы күшейтіліп, биылғы жылы қар тазалау жұмыстарына 189 арнайы техника жұмылдырылмақ. Бұл өткен жылмен салыстырғанда 34 техникаға көп, деп хабарлайды Шымкент қалалық Өңірлік коммуникациялар қызметі.

ӨКҚ Instagram-дағы ақпаратына сүйенсек, 2023 жылы қар тазалау жұмыстарына 155 техника қатысқан. Ал биыл аталған іске 189 техника жұмылдырылып, орталық көшелерді қардан тазалауға мердігер ұйымдардың 2000-ға жуық қызметкері атсалысады.

Мегаполисте жалпы ұзындығы 891 шақырымды қамтитын 443 магистральдық көше бар. Бұл көшелерді тазалауды мемлекеттік-жекеменшік серіктестік аясында бес мердігер ұйым жүзеге асырады. Алдағы қыс мезгілінде қаланың бес ауданында қар тазалау жұмыстары бірнеше ауысымда жүргізіледі.

Аудандар бойынша қар тазалау жоспары:

• Абай ауданы: Тазалау жұмыстары сегіз бағыт бойынша жүргізіледі. Жалпы ұзындығы 357,2 шақырымды құрайтын 80 магистральдық көшені қардан тазарту үшін 37 арнайы техника жұмылдырылады.
• Әл-Фараби ауданы: Тазалау бес бағытта ұйымдастырылып, жалпы ұзындығы 147,4 шақырым 109 магистральдық көшені тазалауға 39 техника тартылады.
• Еңбекші ауданы: Бұл ауданда тазалау бес бағытта жүзеге асып, жалпы ұзындығы 221,6 шақырымдық 83 магистральдық көшеге 38 техника жұмылдырылмақ.
• Тұран ауданы: Жұмыс алты бағыт бойынша ұйымдастырылады. Ал 203,3 шақырымдық 111 көшені тазалауға 36 арнайы техника қатысады.
• Қаратау ауданы: Қар тазалау бес бағытта жүргізіліп, жалпы ұзындығы 181,1 шақырым болатын 83 көшені тазартуға 39 арнайы техника жұмылдырылады.

ӨКҚ мәліметінше, қыс мезгілінде қарды шығару үшін аудан әкімдіктерімен бірлесе арнайы бос алаңдар белгіленіп отыр. Қаланың жолдары мен тротуарларын мұздан қауіпсіз ету мақсатында қажетті инертті материалдар қоры әзірленген.

Одан бөлек шамамен 24 800 текше метр құм мен 13 200 тонна тұз дайындалған. Биыл инертті материалдар қосымша келісімшарт негізінде мемлекеттік-жекеменшік серіктестік аясында сатып алынған.