Желіде Ахмет Жұбанов пен "Құрманғазы" оркестрі таспаланған сирек видео жарияланды

Қазақстанның Мәдениет және ақпарат министрлігі Instagram-дағы ресми парақшасында Ахмет Жұбанов пен "Құрманғазы" оркестрі Құрманғазының атақты "Сарыарқа" күйін орындап жатқан кездегі сирек кадрларды жариялады. Бұл жөнінде KAZ.NUR.KZ хабарлайды.

"Ұлы күйші Құрманғазының бұл туындысы кең байтақ қазақ даласына деген терең махабат пен еркіндікке ұмтылысты жеткізген. "Сарыарқа" күйі Құрманғазының қуғын-сүргін көрген қиын-қыстау кезінде жазылғанымен, ол бүкіл қазақ халқының еркіндікке деген ынтызарлығын айқын көрсетеді. Күй тыңдаушысын жігерлендіріп, туған жердің шексіз кеңістігін көз алдына әкелетін ерекше рухты сезім сыйлайды", - делінген видео астындағы жазбада.

Сонымен қатар министрлік биыл Ахмет Жұбанов атындағы дарынды балаларға арналған мамандандырылған қазақ музыкалық мектеп-интернатының ашылғанына 60 жыл толғанын еске салып, мерейтой аясында өнерсүйер қауымға ерекше концерт ұйымдастырылғанын атап өтті.

Ахмет Қуанұлы Жұбанов — кеңес және қазақ музыкасының дамуына баға жетпес үлес қосқан музыкатанушы, композитор, дирижер, Қазақ КСР халық әртісі, профессор және академик. Оның шығармашылық жолы қазақ халқының ұлттық өнерін әлемге танытуға арналды.