Астанада жаңажылдық шырша шамы қашан жағылатыны белгілі болды

18 желтоқсанда сағат 20.00-де Астананың алты ауданында бір мезгілде жаңажылдық шыршалардың шамы жағылады. Бұл туралы KAZ.NUR.KZ қалалық әкімдікке сілтеме жасап хабарлайды.

Әкімдік мәліметінше, шыршалардың айналасында мұз айдындары, сырғанақтар, шағын архитектуралық нысандар, фотоаймақтар және түрлі ойын-сауық шаралары ұйымдастырылады.

"Бұл күні елорданың алты ауданында 30-дан астам мерекелік шыршаның шамдары жағылады, елорданың әрбір тұрғыны мен қонақтары мерекелік атмосфераны тамашалай алады", - делінген хабарламада.

Қазақстанда желтоқсан айындағы мерекелерге орай қосымша пойыздар мен әуе рейстері ашылатынын еске саламыз.

Министрліктің мәліметінше, жолаушылар тарабынан жоғары сұранысты қанағаттандыру мақсатында 2024 жылғы 13 желтоқсан мен 2025 жылғы 9 қаңтар аралығында теміржол пойыздары мен әуе рейстері саны артады.