Бокстан Қазақстан ерлер құрамасы Париж Олимпиадасы қарсаңында маңызды дайындық жиынын аяқтады. Бұл туралы KAZ.NUR.KZ Ұлттық Олимпиадалық комитеттің ресми сайтына сілтеме жасап хабарлайды.
Бас бапкер Мырзағали Айтжановтың айтуынша, боксшылар оқу-жаттығу жиынын жоғары деңгейде өткізді.
"Боксшыларымыздың жаттығу жиыны өте сапалы өткенін айту керек. Жігіттердің барлығы тапсырманы тиянақты орындады. Ең бастысы – ешкім ауырып қалған жоқ. Бәрі де бабына еніп келе жатыр.
Қазіргі таңда біз боксшыларға аздаған үзіліс бердік. Барлығы да үйлеріне кетті. Көп ұзамай қайта жиналамыз. 9-20 шілде аралығында Түркістан облысындағы "Алма тау" базасында Олимпиада қарсаңындағы соңғы жаттығу жиыны өтеді", - деді Айтжанов.
Естеріңізге сала кетейік, бокстан Қазақстанның ерлер командасы Олимпиадаға толық құрамда қатысады. Бұған дейін Олимпиада ойындарындағы бокс бәсекелерінің толық кестесі жарияланғанын жазған едік.
Мақаланың түпнұсқасы: https://kaz.nur.kz/sport/boxing/2128281-myrzagali-aitzhanov-bokstan-qazaqstan-quramasynyng-olimpiadaga-daiyndygy-turaly-aitty/
