2025 жылы қазақ күресінен ересектер арасындағы әлем чемпионаты Қытайда өтуі мүмкін. Бұл туралы KAZ.NUR.KZ Qazaq Kuresi Ассоциациясының Instagram-дағы парақшасына сілтеме жасап хабарлайды.
Qazaq Kuresi Ассоциациясының бас директоры Дамир Бекбосынов Астанаға іссапармен келген Қытай Халық Республикасы делегациясының өкілдерімен кездесті. Қытайдың Хунань провинциясындағы Чанша қаласы үкіметінің өкілі Ли Ди бүгінгі таңда екі елдің ұлттық күресін дамыту жолында бірлесе жұмыс істеуге деген қызығушылық арта түскенін айтты.
Сондай-ақ шетелдік қонақ Қазақстан мен Қытай арасындағы көп жылғы достық қарым-қатынасты нығайту мақсатында 2025 жылы Қытайда қазақ күресінен ересектер арасындағы әлем чемпионатын өткізу туралы ұсынысын жеткізді. Оның айтуынша, әлем чемпионатын Қытайдың мемлекет және саяси қайраткері Мао Дзэдун туып-өскен Хунань қаласында өткізу маңызды қадам болмақ. Бұл Қытайдағы ең танымал туристік бағыттардың бірі, 66 млн тұрғыны бар әлемге танымал туристік шаһар.
Кездесу барысында Ли Ди 2022 жылы Астанада 40-тан астам елдің 350 спортшысы қатысқан әлем чемпионатының бейнематериалдарымен және қазақ күресі туралы мағлұматтармен танысты. Ал Дамир Бекбосынов әлем чемпионаты сияқты ірі халықаралық доданың Қытай сияқты алпауыт елде өтуі қазақ күресінің дамуына жаңа серпін беретінін атап өтті.
Мақаланың түпнұсқасы: https://kaz.nur.kz/sport/fight/2190716-2025-zhyly-qazaq-kuresinen-alem-chempionaty-korshiles-elde-otui-mumkin/
