Испаниялық "Барселона" футбол клубының бас бапкері Хави Эрнандес қызметінен кетті. Бұл туралы KAZ.NUR.KZ клубтың ресми сайтына сілтеме жасап хабарлайды.
"Бүгін "Барселонаның" президенті Джоан Лапорта Хави Эрнандеске 2024-25 маусымда негізгі команданың жаттықтырушысы болып қалмайтынын айтты.
"Барселона" Хавиге жаттықтырушы ретіндегі жұмысы үшін, сондай-ақ ойыншы және команда капитаны ретіндегі қайталанбас мансабы үшін алғыс айтады және оған жетістіктер тілейді. Келесі бірнеше күнде "Барселона" жаңа жаттықтырушылар штабы туралы хабарландыру жасайды", - делінген клубтың ресми мәлімдемесінде.
"Барселона" Хавидің жетекшілігімен соңғы матчты 26 мамырда Ла Лиганың 38-туры аясында "Севильяға" қарсы өткізеді.
Айта кетейік, Хави 2021 жылдан бері "Барселонаның" бас бапкері қызметін атқарды. Онымен бірге команда Ла Лиганы (2022/23) және Испания Суперкубогын (2022/23) жеңіп алды.
Мақаланың түпнұсқасы: https://kaz.nur.kz/sport/football/2106639-barselona-futbol-klubynyng-bas-bapkeri-qyzmetinen-ketti/
