Бүгін, 10 қарашада футболдан Қазақстан премьер-лигасы мәресіне жетті. Алматылық "Қайрат" төрт дүркін ел чемпионы атанды. KAZ.NUR.KZ тілшісі биылғы маусым қалай өткеніне шолу жасап көрді.
Қазақстан премьер-лигасының жаңа маусымы 1 наурызда әдеттегідей 14 емес, 13 клубпен басталған еді. Себебі "Мақтарал" ұжымы лицензиялау бойынша талаптарға сәйкес келмегені үшін қатысудан шеттетілді. Ал осы клубты алмастыруы керек болған "Ақсу" командасы қаржылық қиындықтарға байланысты турнирден бас тартты.
Жаңа маусым алдындағы жаңалықтардың бірі Қазақстан чемпионатында легионерлерге қойылатын шектеуді алып тастау болды. Бұрын алаңға шыққанда легионер саны міндетті түрде жетеу болса, енді олардың санына шектеу жоқ екені хабарланды. Бірақ өтініш берген кезде жиырма бес футболшының кемінде он үші Қазақстан футболының өкілі болуы керек деген талап қойылды.
Биылғы ҚПЛ маусымында семейлік "Елімай" мен астаналық "Жеңіс" футбол клубтары дебют жасады. "Елімай" маусымды 6-орынмен, ал "Жеңіс" 10-орынмен аяқтады.
Еліміздегі басты футбол додасында тосын жағдайлар да болды. Мәселен, "Шахтер" тарихта алғаш рет премьер-лигадан шығып қалды. Қарағандылық команда Қазақстанның екі дүркін чемпионы, ел кубогының иегері, сондай-ақ еурокубоктардың топтық кезеңіне өткен бірінші қазақстандық клуб саналады.
ҚПЛ соңғы турында чемпиондыққа талас алматылық "Қайрат" пен елордалық "Астана" арасында өрбіді. "Астана" ұжымы шешуші ойында талдықорғандық "Жетісуды" 5:0 есебімен ойсырата ұтқанымен, бұл нәтиже жеңімпаз болуға жетпеді. Ал "Қайрат" командасы сырт алаңда "Атыраудан" басым түсіп, турнир кестесіндегі бірінші орнын сақтап қалды да, Қазақстан чемпионы атанды. Күміс жүлдені "Астана", қола медальді кестеде үшінші орынға тұрақтаған "Ақтөбе" еншіледі.
"Қайрат" ұжымы чемпиондық атақтың арқасында келесі жылы Қазақстан Суперкубогы және УЕФА Чемпиондар лигасының іріктеу кезеңінде бақ сынауға мүмкіндік алды. Турнирдің қорытындысы бойынша, "Астана", "Ақтөбе", "Ордабасы" командалары да еурокубокқа қатыса алады.
Мақаланың түпнұсқасы: https://kaz.nur.kz/sport/football/2185394-futboldan-2024-zhylgy-qazaqstan-chempionaty-aiaqtaldy-biylgy-mausym-qalai-otti/
