Тайбэйде өткен сурдо-жеңіл атлетикадан әлем чемпионатында қазақстандық спортшы Фаина Мейірманова алтын медаль еншіледі. Бұл туралы KAZ.NUR.KZ Қазақстан жеңіл атлетика федерациясының Instagram желісіндегі ресми парақшасына сілтеме жасап хабарлайды.
Фаина Мейірманова биіктікке секіруден жас сурдо спортшылар арасында әлемдік рекорд орнатты.
"Біз сені мақтан тұтамыз, Фаина! Шыңдарды бағындырып, айналаңыздағылардың барлығын шабыттандырыңыз! Спортшының жеке жаттықтырушысы Богдан Весельскийді де құттықтаймыз!", - делінген хабарламада.
Фаина биыл сәуірде Дубайда (БАӘ) өткен 20 жасқа дейінгі спортшылар арасындағы жеңіл атлетикадан Азия чемпионатында биіктікке секіруден күміс жүлде иеленді. Спортшының көрсеткіші 1 метр 76 сантиметр болған еді.
Еске салайық, қазақстандық жеңіл атлет Елизавета Матвеева Олимпиада ойындарында тұңғыш рет өнер көрсететінін жазғанбыз. 26 шілдеде басталатын Париж Олимпиадасында жеңіл атлетикадан 7 спортшы Қазақстан намысын қорғайды.
Мақаланың түпнұсқасы: https://kaz.nur.kz/sport/other-sports/2138982-qazaqstandyq-zhengil-atlet-alem-chempiony-atanyp-rekord-ornatty/
