![Париж Олимпиадасының чемпионы Елдос Сметов Париж Олимпиадасының чемпионы Елдос Сметов](https://cdn.nur.kz/images/1120x630/99c04f7020b6bf91.jpeg)
Париждегі жазғы Олимпиада ойындарының чемпионы атанған дзюдошы Елдос Сметов желіде алғаш рет пікір білдірді. Ол Instagram-дағы парақшасында өзіне қолдау көрсеткен барша жанға алғыс айтты.
Елдос Сметов өз сөзінде алтын медальді екі жағынан да көріп үлгергенін айтты. Ол Парижге тек чемпион болуды мақсат тұтып келгенін алға тартты.
"Мен – Олимпиада чемпионымын! Өзімнің медаль жиынтығыма тек осы бір медаль жетпей тұрды. Бұл медальді осыған дейін екі рет екі жағынан көріп кеттім. Қол созым жерде қалдырдым. Міне, енді Олимпиаданың алтыны - менікі. Парижге тек алтын алуға келген болатынмын. Арманым орындалды. Шүкір, бақыттымын!
Қанша күннен бері мені құттықтап, жылы лебіздеріңізді, сый-сияпаттарыңызды арнап жатқандарыңызды көріп отырмын. Баршаңызға Алла разы болсын! Көп рақмет! Сіздердің қолдауларыңыз, қазақ халқының қолдауы мен үшін қашан да ыстық және әлемнің қай бұрышында күрессем де, мен оны сеземін. Бұл - қазақ спортынының, қазақ дзюдосының көптен күткен тарихи алтыны",- деді дзюдошы.
Осы ретте Олимпиада чемпионы өзіне қолдау көрсеткен барша жанға алғыс айтуды ұмытқан жоқ.
"Қажырлы еңбек, арманға деген адалдық, мақсатқа деген батыл қадамдар, жарақатқа төтеп беру, талап, "дисциплина" мені осы шыңды бағындыруға беттеді. Біздің Олимпиада жолымыз үш бөлімнен тұратын ұзақ сапар болды.
Осы уақыт аралығында маған қолдау көрсеткен, жігерімді жаншымай үнемі жанымнан табылған, сенген, демеген әуелі ата-анама, отбасы-бауырларыма, асыл жарыма, балаларыма шексіз рахметімді айтамын. Әрине, жеке бапкерім, екінші әкем Ғалымжан ағайдың еңбегін сипаттауға сөз жетпейді.
Кәсіби спортшыларды қолдап отырған мемлекетімізге, Қазақстан дзюдо федерациясына және "Динамо" ұжымына, өзімнің Jenys клубыма алғысымды жеткізгім келеді. Баршаңызға армандаңыздар, сеніңіздер және оған қол жеткізіңіздер дегім келеді!", - деді ол.
Мақаланың түпнұсқасы: https://kaz.nur.kz/sport/other-sports/2141853-olimpiada-altyny-meniki-eldos-smetov-parizhdegi-zhengisinen-song-zhelide-algash-ret-pikir-bildirdi/