Көркем гимнастикадан Қазақстан командасының бас бапкері Әлия Юсупова Париж Олимпиадасында бақ сынаған шәкірті Эльжана Таниеваның өнеріне баға берді. Бұл туралы KAZ.NUR.KZ Ұлттық Олимпиадалық комитеттің ресми сайтына сілтеме жасап хабарлайды.
Эльжана Таниева жекелей көпсайыстың финалына шыға алмаған еді. Ол іріктеу кезеңінде 13-орынға жайғасып, ақтық кезеңге өткен үздік ондықтың қатарына енбеді.
"Эльжана Таниева өте еңбекқор спортшы. Ол өзінің алғашқы Олимпиадасына қатысып, керемет әсер алып отыр. Жақсы нәтиже көрсетті деп ойлаймын. Бірақ ұршық жаттығуы үшін өте аз ұпай берді. Таниева доппен жаттығуда өрескел қате жіберіп, допты қолынан түсіріп алды. Ал ұршық жаттығуын өте таза орындап шықты. Бір қызығы, төрешілер таза орындалған ұршық жаттығуына доптан да төмен ұпай берді. Мен бірден төрешілерге шағым түсірдім. Алайда, олар шағымды қанағаттандырған жоқ. Неліктен мұндай төмен ұпай қойғанын түсінбедім.
Одан бөлек, жарысқа бір күн қалғанда бізде тағы бір жағдай болды. Эльжананың таспасында Road to Paris деген жазу бар еді. Ұйымдастырушылар бір күн қалғанда мұндай жазуы бар таспамен жарысқа жіберілмейтінін айтты. Ал спортшылар үшін ұсталған, дайындалған құралмен өнер көрсету өте маңызды. Таңертең дүкеннен су жаңа таспа сатып алдық. Бірақ бұл таспа да жаңа болғандықтан, дұрыс ұшқан жоқ. Содан әлем чемпионы, италиялық София Рафаэллиден бір таспа сұрап алдық. Сол үшін рахмет айтамыз оған.
Эльжананың өзі Олимпиададан керемет әсер алып отыр. 18 жастағы спортшы. Әлі Лос-Анджелес ойындарына дайындаламын дейді. Әлі таланты толық ашылмаған спортшы. Оның жан-жақты қырларын ашуға тырысудамыз. Оны көрермендер үлкен ықыласпен қарсы алады. Қателіктерге келер болсақ, бәрі де қате жіберіп жатыр. Әлем чемпиондары, әлемде үздік үштікке кіретін гимнастар да қателесуде. Сондықтан, Эльжананың болашағына сенеміз", - деді Әлия Юсупова.
Еске салайық, спорттық гимнастикадан Қазақстан құрамасының мүшесі Нариман Құрбанов Париж Олимпиадасының күміс жүлдегері атанған болатын.
Мақаланың түпнұсқасы: https://kaz.nur.kz/sport/other-sports/2146608-toreshilerge-shagym-tusirdim-aliia-iusupova-shakirtining-oneri-olimpiadada-laiyqty-bagalanbaganyn-aitty/
