Көкпардан Қазақстан құрамасы Астанада өтіп жатқан V Дүниежүзілік көшпенділер ойындарының іріктеу кезеңінде Өзбекстан командасын ірі есеппен жеңді. Бұл туралы KAZ.NUR.KZ тілшісі хабарлайды.
V Дүниежүзілік көшпенділер ойындарында көкпардан Қазақстан ұлттық құрамасы Өзбекстан көкпаршыларын 16:00 есебімен жеңді. Бірінші таймда қазақстандық көкпаршылар 8:0 есебімен алда келе жатты. Екінші таймда есепті 16:00-ге жеткізді.
"Қарсыласымызды өте жақсы білеміз. Өзбекстанға барғанда ойнағанбыз. Аттарымызды барынша дайындадық. Жеңіске жетуге барымызды салдық. Бірінші ойында аттарымызды алаңға үйреттік және жігіттер де бабына келді. Алла қаласа бізді финалда көресіздер. Басты қарсылас Қырғызстан құрамасы. Өз елімізде барымызды саламыз, сенімді ақтаймыз", - деді көкпардан ұлттық құрама спортшысы Құрманбек Тұрғанбек.
Астана қаласындағы "Қазанат" ипподромында өтіп жатқан көкпар бәсекесіне 9 мемлекеттің құрамасы қатысып жатыр. Бұл спорт түрінен барлығы 104 спортшы сынға түседі. Көкпардан бақ сынайтын құрамалар: Қазақстан, АҚШ, Ресей, Өзбекстан, Қырғызстан, Венгрия, Қытай, Моңғолия және Түркия. Финалдық ойындар 12 қыркүйекте өтеді.
Айта кетейік, V Дүниежүзілік көшпенділер ойындары 8-14 қыркүйек аралығында Астанада болады. Оған 90-ға жуық елден 2000-нан аса спортшы қатысады. Байрақты бәсекенің басты тақырыбы – "Ұлы дала дүбірі" ұраны. Қатысушылар ат жарысы, ұлттық күрес түрлері, дәстүрлі зияткерлік ойындар, жекпе-жек, садақ ату және халық ойындары сияқты 21 спорт түрінен бақ сынайды. Барлығы 97 медаль жиынтығы сарапқа салынады.
Мақаланың түпнұсқасы: https://kaz.nur.kz/sport/other-sports/2159089-kokpardan-qazaqstan-quramasynyng-zhengisi-dubirli-dodanyng-eng-aserli-suretteri/
