Қазақстандық кәсіпкерлер 14 қыркүйекте Париж Олимпиадасының жүлдегерлері Елдос Сметов, Нұрбек Оралбай және Назым Қызайбайға бір-бір көліктен мінгізіп, сый-құрмет көрсетті. Олимпиаданың ширек финалында өнер көрсеткен Айбек Оралбай да назардан тыс қалмаған, деп хабарлайды KAZ.NUR.KZ.
"Айбек екеумізді бөліп-жармай, екеумізге де темір тұлпар мінгізді. Алла разы болсын, ағалар!"- деп жазды боксшы Айбек Оралбай Instagram-дағы жеке парақшасында.
Кәсіпкер Сырымбек Тау да желіде видео жариялап, Олимпиада жүлдегерлеріне қандай көліктер тарту етілгенін көрсетті.
"Ағалары Айбек еленбей қалмасын деп елеп жатыр", - деді кәсіпкер Айбек Оралбайға табысталған көлікті көрсетіп.
Айта кетейік, Франция астанасы Парижде өткен Олимпиада ойындарының ширек финалдық кезеңінде қазақстандық боксшы Айбек Оралбай Әзербайжан елінің өкілі Лорен Альфонсо Домингеске қарсы кездесу өткізген еді.
Алайда үш раундтың нәтижесінде қазақстандық боксшы 2:3 есебімен жеңіліс тауып, жартылай финалға шыға алмады.
Лорен Альфонсо Домингес 2021 жылғы Токио Олимпиадасының қола жүлдегері атанды. Сондай-ақ боксшы 2021 жылғы Сербиядағы әлем чемпионатында топ жарған.
Мақаланың түпнұсқасы: https://kaz.nur.kz/sport/other-sports/2161360-kasipkerler-parizh-olimpadasynyng-qatysushysy-aibek-oralbaiga-da-temir-tulpar-mingizdi-foto/
