V Дүниежүзілік көшпенділер ойындары аясында өткен көкпардан Қазақстан – Қырғызстан ойынында жеңіс салымын салған Қазақстан құрамасының көшбасшысы Құрманбек Тұрғанбекке ауылдастары ат мінгізді. Бұл туралы KAZ.NUR.KZ тілшісі хабарлайды.
Құрманбек Тұрғанбектің Instagram желісіндегі Stories-ке сүйенсек, оны туған жері Жамбыл облысы, Тоғызтарау ауылының азаматтары сән-салтанатпен күтіп алып, сәйгүлік сыйға тартқан.
Еске салайық, 12 қыркүйекте көкпардан Қазақстан және Қырғызстан құрамалары V Дүниежүзілік көшпенділер ойындарының финалында кездескен еді. Ойынның бірінші кезеңі 1:3 есебімен қырғыз көкпаршыларының пайдасына шешілді. Бірақ екінші кезеңде есеп теңесті (4:4). Ал қосымша уақытта Құрманбек Тұрғанбектің салымының арқасында Қазақстан құрамасы жеңіске жеткен болатын.
Құрманбек Тұрғанбек – көкпардан Қазақстан құрамасының көшбасшысы. Ол Көшпенділер ойындарының екі дүркін жеңімпазы (2022, 2024 жыл), "Алтын тұғыр" сыйлығының, "Ғасыр көкпаршысы" атағының иегері.
Бұған дейін Қырғызстан көк бөрі федерациясының өкілдері Қазақстанға 1 қарашада Ыстықкөл жағасында көкпар мен көк бөріден "Келісім кубогын" өткізуді ұсынғанын жазған едік.
Мақаланың түпнұсқасы: https://kaz.nur.kz/sport/other-sports/2162262-qyrgyzdarga-qarsy-oiynda-zhengis-salymyn-salgan-shabandozga-bagaly-syilyq-tabystaldy/