Италияның Турин қаласында мәресіне жеткен ATP қорытынды турнирінде әлемнің 1-ракеткасы Янник Синнер қарсыластарының бәрін жеңді. Бұл туралы KAZ.NUR.KZ тілшісі хабарлайды.
Аталмыш жарыс барысында Алекс де Минор, Даниил Медведев және Каспер Руудты қапы қалдырған италиялық теннисші финалда америкалық Тейлор Фрицті 6:4, 6:4 есебімен жеңді.
Сонымен қатар италиялық спортшы Янник Синнер жарыс қорытындысында 4 млн 881,5 мың АҚШ доллары көлемінде табыс тауып, абсолют рекорд орнатты. Бұған дейін 2022 жылы қорытынды турнирде Новак Джокович 4 млн 740,3 мың доллар, биыл Кори Гауфф 4 млн 805 мың доллар табыс тапқан еді.
Синнер биыл Australian Open, US Open, сондай-ақ Цинциннати, Роттердам, Майами, Галле және Шанхай додаларында жеңіске жетті. Янник Синнер жаңартылған ATP рейтингісінде 11 830 ұпаймен басқалардан қара үзіп кетті. Екінші орындағы германиялық Александр Зверевтің 7 915 ұпайы бар.
Айта кетейік, Қазақстанның бірінші ракеткасы Александр Бублик 34-орында қалса, Александр Шевченко 80-нен 78-ге, Михаил Кукушкин 113-тен 112-ге, Дмитрий Попко 176-дан 174-ке, Тимофей Скатов 195-тен 192-ге жоғарылады. Денис Евсеев 204-тен 212-ге төмендесе, Бейбіт Жұқаев 238-сатыда қалды.
Мақаланың түпнұсқасы: https://kaz.nur.kz/sport/other-sports/2188841-italiialyq-tennisshi-rekordtyq-kolemde-tabys-tapty/
