Әйгілі бразилиялық футболшы Неймар Дубайдан (БАӘ) 54,45 миллион доллар тұратын пентхаус сатып алды. Бұл туралы KAZ.NUR.KZ Mansion Global порталына сілтеме жасап хабарлайды.
Дереккөздің мәліметінше, Неймар Дубайдағы Bugatti Residences кешенінен 200 миллион дирхамға (54,45 миллион доллар) пентхаус сатып алған. Оның ішінде көліктерді үйге дейін кіргізуге мүмкіндік беретін лифт және Дубай орталығына қараған жекеменшік бассейн бар.
Айта кетейік, қазанда Неймар Майамиден (АҚШ) 26 миллион долларға жер телімін сатып алғаны белгілі болған еді.
32 жастағы Неймар – "Сантос", "Барселона", "Пари Сен-Жермен" және Бразилия құрамасындағы ойындарымен танымал болған футболшы. Ол 2023 жылдан бері Сауд Арабиясының "Әль-Хиляль" командасында ойнайды. Бразилиялық футболшы "Барселона" сапында Чемпиондар лигасы мен Испания чемпионатын жеңіп алды. 2017 жылы Неймар ПСЖ-ға ауысып, тарихтағы ең қымбат футболшы атанды.
Еске салайық, Неймар "Семей" футзал командасына видео жолдап, жаңа маусымға сәттілік тілеген болатын. Сондай-ақ ол қазақстандық теннисші Елена Рыбакинамен кездескен еді.
Мақаланың түпнұсқасы: https://kaz.nur.kz/sport/other-sports/2190159-kolikterge-arnalgan-zheke-lift-bar-neimar-54-mln-dollarga-penthaus-satyp-aldy/
