Жұптық сында Қазақстанның бірінші ракеткасы Анна Данилина Әйелдер теннисі қауымдастығының (WTA) "Жыл жұбы" номинациясына үміткерлер тізіміне қосылды. Бұл туралы KAZ.NUR.KZ WTA-ның ресми сайтына сілтеме жасап хабарлайды.
WTA маусымының қорытындысы бойынша үздік марапаттарға үміткерлер тізімі жарияланды. "Жылдың үздік жұбы" жүлдесіне қазақстандық Анна Данилина мен ресейлік Ирина Хромачева да үміткер болып отыр.
Қос теннисші WTA маусымындағы алғашқы командалық жарысында Пармада WTA 125 титулын, содан кейін Бариде тағы бір WTA 125 титулын жеңіп алды. Сондай-ақ олар Будапешттегі турнирдің финалистері болды, Гвадалахарадағы WTA 500 және Хуахиндегі WTA 250 жарыстарында жеңіске жетіп, кейін Уханьдағы WTA 1000 турнирінде топ жарды. Хромачева жылды 8-орында, ал Данилина 22-орында аяқтайды.
Анна Данилина мен Ирина Хромачевадан бөлек, "Жыл жұбы" аталымына Габриэла Дабровски мен Эрин Рутлиф (Канада/ Жаңа Зеландия), Катержина Синякова мен Тэйлор Таунсенд (Чехия/АҚШ), Сара Эррани мен Жасмине Паолини (Италия), Людмила Киченок пен Елена Остапенко (Украина/Латвия) және Се Су-Вей мен Элизе Мертенс (Тайвань/Бельгия) үміткер болып отыр. Жеңімпаздар БАҚ өкілдерінің дауыс беруі арқылы анықталады.
Мақаланың түпнұсқасы: https://kaz.nur.kz/sport/other-sports/2190590-qazaqstannyng-birinshi-raketkasy-bedeldi-halyqaralyq-marapatqa-umitker-atandy/
