Еркін күрестен әлем чемпионы Нұрқожа Қайпановқа Солтүстік Қазақстан облысы әкімдігі тарапынан автокөлік сыйға тартылды. Бұл туралы KAZ.NUR.KZ CҚО әкімдігінің Instagram-дағы парақшасына сілтеме жасап хабарлайды.
Балуанға спорттық жетістіктері үшін СҚО әкімінің құрмет грамотасы мен автокөліктің кілті табысталған. Ал Нұрқожаның жеке бапкері Сағындық Бейсембаевқа 3 миллион теңгенің сертификаты берілсе, спортшының ата-анасы Аралбек Қайпанұлы мен Перизат Қанатбайқызы СҚО әкімінің алғыс хатына ие болды.
Еске салайық, осыған дейін Нұрқожа Қайпановқа кәсіпкер Ерлан Қожасбай Zeekr 001 көлігінің кілтін табыстаған еді.
Нұрқожа Қайпанов Тиранада (Албания) өткен олимпиадалық емес салмақ дәрежелеріндегі әлем чемпионатында алтын медаль жеңіп алған болатын. Ол еркін күрестен 70 килограммға дейінгі салмақта бақ сынап, финалда жапондық Ешиносуке Аоягиді 5:3 есебімен ұтты. Осылайша Қайпанов еркін күрестен әлем чемпионы атанған екінші қазақ балуаны болды. Былтыр Сербия астанасы Белградта Ризабек Айтмұхан 92 кг дейінгі салмақта топ жарған еді.
Мақаланың түпнұсқасы: https://kaz.nur.kz/sport/other-sports/2192987-erkin-kuresten-alem-chempiony-nurqozha-qaipanovqa-tagy-bir-kolik-syiga-berildi-foto/
