Түркияда президент сайлауының екінші туры басталды
Жарияланған күні:
![Түркиядағы сайлау Түркиядағы сайлау](https://cdn.nur.kz/images/1120x630/3eea6f36fa4b20a7.jpeg)
Түркияда 28 мамырда жергілікті уақыт бойынша таңғы сағат 8:00-ден президент сайлауының екінші туры басталды, ол 13-ші мемлекет басшысы кім болатынын көрсетеді, деп хабарлайды ҚазАқпарат.
Агенттіктің меншікті тілшісінің хабарлауынша, бүкіл ел бойынша сайлау учаскелері таңғы 8:00-де ашылып, жергілікті уақыт бойынша 17:00-де жабылады. Елде дауыс беруге арналған 191 мыңнан астам жәшік орнатылған.
Түркиядағы президент сайлауына екі кандидат қатысып жатыр – қазіргі мемлекет басшысы Режеп Тайып Ердоған және біріккен оппозицияның жетекшісі Кемал Кылычдароғлу.
"14 мамырда өткен дауыс берудің бірінші турының қорытындысы бойынша ел президенті анықталған жоқ, өйткені жетекші кандидаттар сайлаушылардың 50+1 дауысының шекті көрсеткішін ала алмады. Сонымен бірге президенттікке үміткерлер Синан Оган мен Мухаррем Индже сайлаудан халықтың қолдауы болмағандықтан шығып қалды", – делінген хабарламада.
Президент сайлауында сайлаушылар жеке басын куәландыратын ресми құжаттардың бірімен дауыс бере алады.
Сайлаушыларға президенттікке үміткер екі кандидаттың есімі жазылған бір бюллетень беріледі. Денсаулық жағдайына байланысты сайлау учаскелеріне келе алмайтын азаматтар үшін "мобильді жәшіктер" жұмыс істейтін болады. Сондай-ақ, көру қабілеті нашар адамдардың жеке санаты арнайы дайындалған шаблон бойынша өз дауыстарын бере алады.
Сонымен қатар, Түркияның жоғарғы сайлау комиссиясы ақпан айындағы жер сілкінісінен зардап шеккен елдегі 11 провинциясында дауыс беру үшін барлық қажетті шараларды қабылдады. Бұл өңірлерде дауыс беру жәшіктері арнайы бөлінген контейнерлер мен мектептерде орнатылған.
Шетелдегі учаскелерде дауыс беруге 3,5 млн астам адам қатысқан. Олар үшін 73 елде және 156 шетелдік өкілдікте сайлау комиссиялары құрылған. Шетелде тұратын Түркия азаматтарына дауыс беру процесі 24 мамырда аяқталды.
Сайлау учаскелері сағат 17.00-де жабылғаннан кейін дауыстарды санау басталады. Сайлау қорытындысы елдің жергілікті уақытымен кешкі сағат 21:00-ден кейін жарияланады.
Мақаланың түпнұсқасы: https://kaz.nur.kz/world/2022332-turkiyada-prezident-sailauynyn-ekinsi-tury-bastaldy/