Үш елде еврейлерге қарсы теракт дайындады деген күдікпен ХАМАС мүшелері ұсталды

Германия, Нидерланд және Данияда бейсенбіде жеті адам тұтқындалды. Израиль және жергілікті құқық қорғау органдары оларды ХАМАС тобының мүшелері деп санаған және еврейлерге қарсы шабуылдар мен басқа да террористік әрекеттерді жоспарлаған деп айыптады.

Неміс прокуратурасы ХАМАС-пен байланысы бар үш адамның Берлинде тұтқындалғанын, тағы бір Нидерланд азаматын немістердің өтініші бойынша Роттердамда жергілікті полиция ұстағанын мәлімдеді.

Берлинде ұсталған үш адам - Ливан мен Мысырдан келген иммигранттар. Неміс прокуратурасының мәліметінше, төртеуі де бұрыннан ХАМАС-тың мүшесі болған, нақтырақ айтсақ, топтың қарулы қанаты "әл-Кассам бригадаларымен" байланысы бар.

Газа секторын басқаратын ХАМАС-қа Еуропа елдерінде террористік ұйым ретінде тыйым салынған.

Германия прокуратурасы мәлімдемесінде қамауға алынғандардың бірі Ливандағы ХАМАС басшылығынан біраз уақыт бұрын ХАМАС мүшелері жасаған қару-жарақ қоймасын табу деген тапсырма алғанын айтады.

"Қару Берлинге жеткізіліп, Еуропадағы еврей ұйымдарына қарсы ықтимал террористік шабуылдарға дайын болуы керек еді", - делінген мәлімдемеде.