Армения Мәскеуден Ресей шекарашыларын Ереван әуежайынан шығаруды сұрады

Ереван Мәскеуге "Звартноц" халықаралық әуежайының бақылау-өткізу бекетінде жұмыс істейтін ресейлік шекарашыларды қайтарып алуды ұсынды.

Федералды қауіпсіздік қызметіне жататын Ресей шекара қызметінің әскерилері әуежайда 1992 жылы қол қойылған Армения аумағындағы Ресей шекара қызметінің мәртебесі туралы шарт негізінде қызмет атқарады.

Осы шарт бойынша Ресей шекара әскерлерінің төрт отряды Арменияның Түркия және Иранмен шекарасында Гюмри, Армавир, Арташат және Мегри елді мекендерінде бақылау жүргізіп келеді.

Федералды қауіпсіздік қызметінің жеке бөлімшесі Ереван әуежайының бақылау-өткізу бекетінде әлі күнге дейін жұмыс істеп келеді.

Шарт жасалған кезде Арменияның өз шекара қызметі болмаған.

Сәрсенбіде Армения Қауіпсіздік кеңесінің хатшысы Армен Григорян "Әуежайдағы бақылауды елдің Ұлттық қауіпсіздік қызметінің шекаралық әскерлері толығымен іске асыруы керек" деп мәлімдеді.

"Мұндай қажеттілік неге туындады?", - деген сұраққа Григорян: "Тәуелсіздік кезеңінде Армения әуежайды толық бақылауға алу үшін барлық мүмкіндіктерге ие болды", - деп жауап берді, деп хабарлайды Armenpress.

"Арменияның бұл мәселе бойынша нақты ұстанымы бар. Бұл нақты ұстаным Ресей Федерациясына ресми хат арқылы хабарланды", - деді Григорян журналистерге.

Сейсенбі таңертең Кремльдің баспасөз хатшысы Дмитрий Песков Ресей билігіне мұндай шешімдер туралы хабарланбағанын айтты.

"Звартноцтағы" шекарашыларға келетін болсақ, біздің түсінуімізше, бұл мәселе бойынша ешқандай шешім қабылданған жоқ және бұл шешімдерді бізге ресми арналар арқылы ешкім жеткізген жоқ", - деп жазды Песковқа сілтеме жасаған ТАСС.

Кейбір армян саясаткерлері Ресей соңғы Қарабақ соғысында одақтасын қорғай алмағаннан кейін Арменияда ресейлік бітімгершілік контингентінің жүруі ұнамсыз болып қалды деп мәлімдеді.

Атап айтқанда, мұндай пікірді Армения Ұлттық жиналысының басшысы Ален Симонян ақпан айының соңында білдірді.

"Мен олардың еліміздің шекарасын қорғайтынына сенімді емеспін. Сіздер сенімдісіздер ме? Олардың қорғамағаны бірнеше рет расталды, олар шекараны әлдеқайда осал ету үшін бәрін жасады. Олар Қарабаққа келді, не істеді? Олар армян халқын шығарып жіберді, олар осылай қорғай ма? Бір күні бізді де "Звартноцтан" шығарып жіберу үшін бе?" – деді Симонян өткен аптада.