Ирандағы тікұшақ апаты: желіде төтенше жағдай орнында түсірілген видео жарияланды

Желіде Ирандағы тікұшақ апатынан қаза тапқандардың денесі тасымалданып жатқаны түсірілген видео пайда болды. Бұл туралы IRNA ақпарат агенттігінің X-тегі аккаунтына сілтеме жасаған KAZ.NUR.KZ хабарлайды.

Иранның ақпарат агенттіктері мен журналистері Иран президенті Ибрахим Раиси мен өзге де үкімет өкілдері мінген тікұшақ құлаған жерден жаңа видео жариялады.

IRNA ақпарат агенттігі X әлеуметтік желісіндегі парақшасында жүктеген видеода марқұмдардың денесі тасымалданып жатқаны көрінеді.

Сондай-ақ жергілікті БАҚ ақпараты бойынша, марқұмдардың денесін іздеу жұмыстары аяқталды. Қаза тапқандардың барлығының денесі апат орнынан Тебризге жеткізіледі. Бұл туралы Иранның Қызыл Жарты Ай қоғамының (IRCS) басшысы Пир-Хосейн Куливанд мәлімдеді.

"Тікұшақта болған барлық жолаушының денесі жедел жәрдемге жеткізіліп, Тебриз зиратына жеткізіледі", - деп жазады Tasnim агенттігі оның сөзіне сүйеніп.