Елдің тәуелсіздігі үшін күрескен Шотландияның бұрынғы бірінші министрі Алекс Салмонд қайтыс болды

Шотландияның бұрынғы бірінші министрі және Шотландияның ұлттық партиясының (SNP) жетекшісі Алекс Салмонд 12 қазанда Солтүстік Македонияға барған сапарында қайтыс болды.

Ұлыбритания премьер-министрі Кейр Стармер Салмондты "Шотландия мен Британ саясатындағы монументалды тұлға" деп атады.

Ол Алекс Салмондтың Шотландияға, оның мұрасына, тарихы мен мәдениетіне, сондай-ақ көптеген жыл бойы Шотландия Парламенті мен Британ парламентінің мүшесі болғанын атап өтті.

Шотландияның қазіргі бірінші министрі Джон Свинни Салмондтың қайтыс болғаны туралы хабарға қайғырғанын айтып, "Алекс өзінің жақсы көретін елі мен оның тәуелсіздігі үшін аянбай еңбек етіп, қорықпай күрескенін" айтты.

Саяси жол

Алекс Салмонд Ұлыбритания және Солтүстік Ирландия Біріккен Корольдігінен бөлініп шығуды мақсат еткен Шотландия ұлттық партиясын екі рет басқарып, 2007 жылғы сайлауда ол билікке келді.

2014 жылы Шотландияның тәуелсіздігі туралы арманына жетуге жақын қалған еді, бірақ шотландтардың 55,3 пайызы тәуелсіздік туралы референдумда қарсы дауыс берді.

Содан кейін Салмонд SNP көшбасшысы қызметінен кетті.

Ол 2015 жылы Британ парламентіне сайланды, бірақ кейін 2017 жылғы кезектен тыс сайлауда өз округі бойынша жеңіліп қалды.

2018 жылы ол Шотландияның Ұлттық партиясынан толығымен шықты, ол қосылған кезде шағын ұйым болған, бірақ оның қол астындағы Шотландия саясатындағы басым күшке айналды.

2021 жылы Салмонд Шотландияның тәуелсіздігін жақтайтын тағы бір "Альба" партиясын құрған болатын.