"Соғыс тезірек аяқталатынына сенімдімін": Зеленский Трамп саясаты туралы ойын айтты

Украина президенті Владимир Зеленский Дональд Трамппен телефон арқылы сөйлескеннен кейін жаңа әкімшілік тұсында Ресеймен соғыс болжанған уақыттан ертерек аяқталатынына сенімді бола түскенін айтты.

Зеленскийдің айтуынша, телефон арқылы сөйлескенде Трамппен конструктивті диалог болған.

Ол Трамптың Ресеймен ықтимал келіссөздерге қатысты қандай да бір талап қойған-қоймағанын нақтыламады, бірақ ол жаңадан сайланған Америка президентінен Украинаның ұстанымына қайшы келетін ештеңе естімегенін айтты.

Трамп сайлауда жеңіске жеткен жағдайда Украинадағы соғысты тоқтату оның басымдықтарының бірі болатынын бірнеше рет айтқан. Ол сондай-ақ Киевке ауқымды әскери көмек көрсету АҚШ ресурстарының сарқылуына әкеп соғатынын және мұны тоқтатуға ниетті екенін мәлімдеген.

"Ақ үйді басқаратын команда саясатының арқасында соғыс тезірек аяқталатынына сенімдімін. Бұл олардың көзқарасы, өз азаматтарына берген уәдесі", - деді Зеленский украиналық БАҚ-қа берген сұқбатында.

Ал АҚШ-та сайлау өткеннен кейін екі күн өткен соң сайланған президенттің жақын серігі Брайан Ланза жаңа әкімшілік Украинада бейбітшілік орнатуға ұмтылғанымен, Киевке жоғалған аумақтарды, әсіресе Қырымды қайтаруға көмектеспейтінін атап өткенін есте ұстаған жөн.

Владимир Зеленский, сондай-ақ, Украина бұл соғыс келесі жылы аяқталуы үшін қолдан келгеннің бәрін жасауы керек екенін айтты. Оның айтуынша, ұрыс даласындағы жағдай қиын, ресейлік әскерлер шабуыл жасап жатыр.

Украиналық дереккөздердің мәліметінше, Зеленский соғыс дипломатиялық жолмен аяқталуы керек деп санайды, бірақ Киев Мәскеумен келіссөздерді тек АҚШ-тың қолдауымен және күш позициясынан бастау керек екенін баса айтқан.

Бұл ретте Украина президенті Владимир Путин саяси оқшаулануды тоқтатуы керек болса да, әділетті бітімге келуге мүдделі емес деп санайды.