Нью-Йоркте Рождество мерекесінде такси жүргізушісі алаңда жүрген бірнеше адамды қағып кетті

Нью-Йорктегі адам көп жүретін алаңда такси жүргізушісі жаяу жүрген адамдарды қағып өтіп, салдарынан кемінде алты адам зардап шекті. Бұл туралы Fox News арнасына сілтеме жасаған KAZ.NUR.KZ хабарлайды.

Нью-Йорк полиция департаменті Бродвей, Алтыншы авеню және 34-ші көше қиылысатын танымал туристік Геральд-скверде такси бірнеше адамды қағып кеткенін растады.

Полицейлердің мәліметінше, такси жүргізушісі – 58 жастағы ер адам. Апатқа не себеп болғаны әзірге белгісіз.

Жергілікті билік өкілдері 9 жасар баланың жарақат алып, аяғын ауыртып, ауруханаға жеткізілгенін хабарлады. Сонымен қатар 41 және 49 жастағы әйел түрлі жарақат алған.

Қалған зардап шеккендерге медициналық көмек қажет болмаған.

Көлік жүргізушісі ұсталған жоқ. Қазіргі уақытта тергеу амалдары жүргізілуде.