Астаналықтар қарсыласын ойсырата ұтқан Шүменовпен "селфи" жасауға кезекке тұрды

Бүгін Астанада қала тұрғыдары асыға күткен бокс бәсекесі өтті. Былғары қолғап шеберлерінің айтулы додасында белгілі боксшы Бейбіт Шүменов түрік елінен келген Хизни Алтункаядан басым түсіп, әлем чемпионы титулын өзіне қайтарып алды деп хабарлайды NUR.KZ порталы.

"Барыс арена" спорт кешенінде өткен спорт додасына келушілердің қарасы қалың болды. Спортсүйер қауым әсіресе кештің басты додасы Бейбіт Шүменов пен түрік боксшысы Хизни Алтункаяның қолғап түйістіру сәтін асыға күтті.

Айта кетерлігі, Шүменовтің жекпе-жегінен бөлек шаршы алаңға еліміздің өзге де боксшылары қатысты. Әр жекпе-жектің арасында отандық белгілі әншілер сахнада ән айтып, кеш қонақтарына мерекелік көңіл-күй сыйлады.

Ал шаршы алаңға Бейбіт Шүменов пен оның қарсыласы Хинзи Алтункая шыққанда көрермендер тіптен орындарынан тұрып, боксшыларды үлкен қошеметпен қарсы алды.

Жекпе-жек басталысымен қос спортшы кезек-кезек соққы жасап, бір-бірінің осал тұстарын табуға тырысты. Ал, алғашқы раундтардың бірінде Шүменов тіпті түрік боксшысына ауыр соққы жасап, оны кішігірім нокдаунға жіберіп үлгерген еді.

Тоғыз раундқа созылған жекпе-жекте Бейбіт Шүменов жеңіске жетіп, өзінің 18-жеңісіне қол жеткізді.

Мәтіннен қате тапсаңыз, бізге жазыңыз