RU
Қымбат мейрамханада кездесу өткізген шымкенттік әкім сынға қалды
Жаңалықтар Қоғам

Қымбат мейрамханада кездесу өткізген шымкенттік әкім сынға қалды

Рассказать Вконтакте

Еліміздің үшінші мегаполисіне айналған Шымкент қаласына қарасты әл-Фараби ауданының әкімі Ғабит Мәуленқұлов халықпен кездесуін қымбат мейрамханада өткізіп, айды аспанға бір-ақ шығарды. Бұл туралы Zamana.kz-ке сілтеме жасаған NUR.KZ хабарлайды.

Қымбат мейрамханада кездесу өткізген шымкенттік әкім сынға қалды

Ғабит Мәуленқұлов. Фото: zamana

Жаңадан тағайындалған әкім өзіне бағынышты құрылым басшыларымен жақын танысып, жұмысын бастамас бұрын жергілікті зия­лы қауым өкілдерін ақ дастархан басына шақыруды жөн көріпті.

«Ай-ғасыр» мейрамханасында өткен кездесуде аудан ақсақалдары бата беріп, «Абдул Хамид Қаттани» мешітінің наиб-имамы әруақтарға құран бағыштаған.

Ғабит Мәуленқұловтың бұл қылығын құп көрмеген "Abai.kz" порталының тілшісі Нұрбике Бексұлтанқызы "арзан пиар жасаған" әкімді сынның астына алды.

"Әкім – жергілікті биліктің айнасы. Әрине, қазақылық реңк беріп, әруақтарға құран оқыту бір қарағанда дұрыс та шығар. Бірақ бұл асқа қаржы қайдан алынды? Мемлекеттен бе? Елдің шөкімдеп жиған салығын мейрамханада ас беруге жұмсауға ешкімнің хақысы жоқ. Бұл – бір.

Екіншіден, «қаржы әкімнің жеке қалтасынан төленді» дегеннің өзінде ашықтан-ашық (әлеуметтік желіге жариялап) зиялы қауымның аузын майлап, тамаққа тойдыру сыбайлас жемқорлыққа жол ашары анық.

«Су ішкен құдығына түкірмейтін» қазақ түрлі жағдай туа қалса Мәуленқұловтың дастарханын аттап кете алмайтыны тағы анық.

Үшіншіден, бұл үрдіс басқа әкімдерге «үлгі» болып кетсе, сорымыз және қайнайды. Дастархан басы – ағыл-тегіл тілек пен мақтау үшін таптырмайтын орын. Мұның пайдасынан зияны көп екенін мейрамханада кездесу өткізбей-ақ көріп жүрген жоқпыз ба?", - дейді ол.

Шымкенттік әкімдердің ерекшеленуге бейім екенін алға тартқан тілші Ғабидолла Әбдірахымовтың та түрлі "қылықтарын" тізбектей келе, бұл "індет" өзгелерге жұқпай тұрып сақтану керектігін жазады.

"Әкіммен кездесу тойға айналмауы керек. Аста-төк дастархан жайып, бата тілеп, қол жайып жүрген Мәуленқұловтың сыбағасын Ғабидолла Әбдірахымов беруге тиіс", - деп аяқтады сөзін Нұрбике Бексұлтанқызы.
Қызықты оқиғалардан үнемі хабардар болғыңыз келе ме?
Біздің Telegram каналымызға жазылыңыздар!
Сіздің реакцияңыз
5
0
0
0
1
5
3
Спасибо за Ваше мнение Вы уже голосовали
Тағы да оқыңыздар
Пікір
Mailfire view pixel