Астаналықтар тегін әжетханасы бар мұз қалашықтарына ағылуда (фото)

Жаңа жылдан кейін үш күн қатарынан демалған астаналықтар қаладағы мұз қалашықтары мен сырғанақтарды торуылдаумен болды. Бас қаладағы мұз сырғанақтарда ине шаншар орын болған жоқ деп хабарлайды NUR.KZ.

Биыл елорда бойынша бірнеше мұз айдыны мен сырғанақтар ашылды.

Астаналықтардың таңдауы әсіресе Пирамидадан бастап Ақордаға қарай бет алған сырғанаққа көп түскен.

Мұнда қала тұрғындарының демалысы үшін барлық жағдай жасалған. Елордалықтардың кейбірі мұз қалашығында мынадай ерекше орындықта тізе бүктірсе, енді бірі қар үстінде жүретін көліктерге отырумен болды.

Сондай-ақ, мұз қалашығында тегін әжетхана да орнатылған.

Қуантарлығы қалашықтарда қоқыс тастайтын жәшіктер де тұрды.

Мұз сырғанақтарының қызығын әсіресе қаланың кішкентай тұрғындары көруде. Ұзындығы 50 метрден астам сырғанаққа келушілердің қатары көп болғаны соншалық, олардың көпшілігі кезек күтумен тұрды.

"Биыл мұз қалашықтары қала бойынша өте көп салынды. Демалыс күндері далада серуендегенге не жетсін? Сол себепті отбасымызбен келіп қалдық. Жалпы демалыс күндеріміз керемет өтуде", - дейді қала тұрғындарының бірі.