Құрбан айт: Ақтөбелік көпбалалы аналар пакет алып, мал базарын жағалап жүр (фото)

Бүгін күллі мұсылман қауымы үшін ұлық мереке - Құрбан айт тойланып жатыр. Ақтөбеде бір сапта тұрып намаз оқыған тұрғындар бірін-бірі мерекемен құттықтап, мал базарына қарай ағылуда деп хабарлайды өңірдегі KAZ.NUR.KZ тілшісі.

Базарда халық ығы-жығы. Мал саудасы қызып тұр. 

Бір тоқтының бағасы 25 мың теңгеден басталса, семіз қойды 45 мың теңгеге табасыз. Ал ірі-қараның бағасы 180 мыңнан басталады.

"Бүгін базарға келіп жатқан малдың санын есептеу мүмкін емес. Өте көп. Мал саудалаушылардың да, құрбандық шалушылардың да саны өте көп.

Мал сойылу таң намазынан кейін бірден басталды. Кешке дейін сойылады. Үш күн бойына осындай жағдай болады.

Базарда ресми түрде 70 мал сою орны бар. Ресми еместерін қосқанда жүзден асып кетеді.

Қасапшылар саны да осындай. Өзіміздің 50 қасапшымызбен қоса, сырттан келгендерді қосқанда базарда жүзден аса қасапшы жүр.

Сонымен қатар, ертеден құрбандық шалудың ретін үйретіп жүрген 5-6 имам келді", - дейді базар басшысы Ғалым Ұқасов.

Базарда құжаттарын көрсетіп көпбалалы аналар да жүр. Олар жағдайларын айтып, құрбан шалушылардан еттің бір бөлігін сұрап алуда.

Ал 3 мың теңгеге малыңды сойып, бөлшектеп беретін қасапшылар бәрін де Алланың атымен жасап жатқанын айтады.

"Бір малды сойып, бөлшектеуге 5-10 минут кетеді. Тарататын адамды іздеудің керегі жоқ. Көпбалалы аналар, ақ жаулықты әжелер пакеттерін ұстап өріп жүр", - дейді Бақытжан есімді қасапшы.