Выйти
RU

"Алланың нәсіп еткен өміріне де, сынағына да разымын": Бейсен Құранбектің жары оның соңғы сөздерін жеткізді

Рассказать в Telegram Рассказать Вконтакте

18 мамыр күні Бейсен Құранбектің қазасы туралы қаралы хабар барша қазақ халқының қабырғасын қайыстырды. Содан бері желіде белгілі журналистке жазба арнап, оның отбасына қайғыра көңіл айтқан жұртшылықтың санында шек болмады. Елдің ыстық ықыласын барынша сезінген тележүргізушінің жары бүгін көпшілікпен байланысқа шығып, халыққа отағасының соңғы сөздерін жеткізді деп жазады KAZ.NUR.KZ.

Фото: Instagram/beisenkuranbek. Коллаж: KAZ.NUR.KZ

Фото: Instagram/beisenkuranbek. Коллаж: KAZ.NUR.KZ

Бейсен Құранбектің жары оның Instagram парақшасында аса әсерлі жазба жариялап, желі қолданушыларын жылатты. Ол жолдасының қазасына орай өздеріне қолдау білдіріп жандардың барлығына алғыс айтты.

"Ардақтым, азаматым, асыл жарым өмірден өтті. Мәңгілік мекеніне жетті. Ол кісінің демі үзілсе, менің де тынысым тоқтайтындай көрінетін. Алайда кеудемдегі жаным шықпаған соң, тірі адам тіршілігін жасай береді демекші, басымды көтеріп, айналама қарауыма тура келді. Алланың ісіне көндім.

Бейсекемнің артынан қаза қайырлы болсын айтып жатқан адамның санында есеп жоқ, қалың қазақ қабырғасы қайысып, көңіл айтуда. Еліміздің игі жақсылары лебіздерін білдіріп, жеделхаттар жолдап жатыр. Әлеуметтік желілердегі жазбалар, арнаулар мен комментарийлерді  бей-жай оқу мүмкін емес. Жүрегіңді қан жылатады деген ағайынның өзара әңгімесін үш күннен бері естудемін.

Тағы да оқыңыздар

Қорқыт ата туралы не білеміз?

Олардың барлығын ашып оқуға жүйкем шыдамады. Әйтсе де кеше бірқатарын көрдім, түсіндім. Көрермен қауым, жора-жолдас, майдандас әріптестер, үлгі тұтып соңынан ерген жастар қандай тұлғадан айрылып қалғанын сөзбен жеткізе алмай, зар илеп жоқтап жатыр.

Телеарналар Бекең туралы сюжеттері мен хабарларын жедел түрде дайындап, халық назарына ұсынып, ыстық ықыластарын білдіруде. Алыс-жақын шетелдердегі бауырлар да орны толмас қайғыға ортақтасуда. Баршаңызға әулетіміздің атынан алғысымды білдіремін" , - деп жазды ол.

Тележүргізушінің жұбайы оның ауыр дертіне қатысты бар шындықты айтып, отағасының дүниеден өтер кезіндегі соңғы сөздерін жариялады.

"Бейсекемнің  мақтауын жеткізіп, бояуды аямай, әсірелеп айта берсем болар еді, бірақ, Құдайға шүкір, оны меннен неше есе артық жақсы жеткізетін адамдар баршылық. Әрі оның шынайы бейнесін бетпе бет кездескенде де, көгілдір экраннан да өздеріңіз көріп, бағасын беріп жатырсыздар. Сондықтан мен оның осы дүниеден шын дүниеге өтер кезіндегі соңғы ойларын ғана жеткізсем деймін.
Ол ұзақ ауырды. Аурудың жақсысы жоқ, алайда нақ осы дерт адамның сабырлылығы мен төзімін сынауға арналған ба деген ойға қалдым. Ауру дендеп, денені құрсап, қинап жатса да, Бейсекем қабағын бір шытпады. «Мына ауру пәле болды, шаршатты» дегенді айтпады. Дүниеден озу осындай да болады екен" , - деп жазды.

Тағы да оқыңыздар

Тележүргізуші Дана Нұржігіттің өмірбаяны

Төменде Бейсен Құранбектің соңғы сөздерін келтіреміз:

Құдайым мені қай кезде аламын десе де дайынмын. Алланың маған нәсіп еткен өміріне де, сынағына да разымын. Мен жақсы өмір сүрдім. Маған Алла тағала жақсы ата-ана, жанашыр бауыр, адал жар, сүйкімді бала сыйлады. Он екі мүшемді сау қылып. бойыма қуат берді. Миыма сана, жүрегіме рух берді. Басыма бақ қондырды. Ел-жүртыма маңдай терімді сыпырып жүріп қызмет етуге мүмкіндік берді. Тағы уақыт берсе, тағы да аянбай қызмет етуге даярмын. Мені жақындарыммен, балаларыммен сынамай, жеке басыма дерт беріп, өз денеммен сынап жатқанына тағы да шексіз ризамын. Ризамын", - деді Бейсен Құранбек.

Ең маңызды әрі қызықты жаңалықтарды біздің Telegram арнамыздан оқыңыздар!

Тағы да оқыңыздар
Жүктеу...
"Алланың нәсіп еткен өміріне де, сынағына да разымын": Бейсен Құранбектің жары оның соңғы сөздерін жеткізді
Mailfire view pixel