Top.Mail.Ru

Сайт нұсқасы

ru kz

Зектілері

Түркістан облысында медициналық қолғаптың сапасын сынаған хирург жұмысынан босатылды

Опубликовано:

Түркістан облысы Келес ауданы Абай атындағы аурухананың хирург дәрігері Қайрат Сейдуалиев медициналық қолғаптың сапасын сынға алып әлеуметтік желіге видео жариялаған болатын, Көп ұзамай хирург қызметінен босатылған деп хабарлайды KAZ.NUR.KZ.

Түркістан облысында медициналық қолғаптың сапасын сынаған хирург жұмыстан қуылды
Фото: Видеодан кадр: UGC

Сейдуалиев ота жасауға берілген медициналық қолғаптардың киюге жарамсыз, тез жыртылып қалатынын айтып әлеуметтік желілерде видео жариялаған. Ол аурухана басшылығы бұл олқылықтардың орнын толтырады деген үміті болғанын жасырмайды.

Алайда, көп ұзамай дәрігердің жұмыстан шығарылғаны белгілі болды. Бұл ақпаратты Түркістан облыстық қоғамдық даму басқармасының баспасөз қызметі де растап отыр.

7 жыл бойы ауруханада қабылдау бөлімінде меңгерушілік еткен дәрігер "Дипломмен ауылға" бағдарламасы бойынша жұмысқа орналасқан екен. Ал Абай ауруханасының бас дәрігері Аида Бексұлтанқызы медициналық қолғаптардың сапасыз екенін әшкерелеген хирургті жала жапты деп отыр.

Онымен қоймай, бас дәрігер жұмыстан шығарылған хирургті жеңілтек, әріптестерімен қарым-қатынасы нашар екенін жеткізген.

"Абай ауруханасының хирургі қызметін атқарған Сейдулиев Қайрат Әкімқожаұлы жеңіл мінезді, тез ашуланғыш дәрігер. Осы жылдың ақпан айында тәртіптік ескерту берілсе, 30 наурыз күні науқастың шағымы бойынша қабылдау бөлімі меңгерушісі қызметінен хирург дәрігер қызметіне ауыстырылған.
Медициналық резеңке қолғап туралы жалған мәлімет таратқан. Өйткені, қолғап туралы емхананың басшылығына, аға мейірбикеге өтінім бермеген. Жеңілтек мінезімен видео түсіріп әлеуметтік желіге салып жіберген.
Денсаулық сақтау министрлігі бас санитариялық дәрігерінің медициналық мекемелерде аудио, видео жазбаларына тыйым салынғанын қатаң ескертуіне қарамаған. Осы жіберілген кемшіліктерді негізге ала отырып, жеке еңбек дауларын қарау комиссиясының бір ауыздан қабылдаған шешімімен жұмыстан шығарылды", - дейді бас дәрігер Аида Бексұлтанқызы.

Ал хирург дәрігер өз іс-әрекеті үшін жұмыстан босатылуының қаншалықты заңды екенін білмей отырғанын айтады.

"Президентіміз Қасым-Жомарт Тоқаевтың "Тыңдайтын үкімет", "халықты тыңдаңдар, медициналық мекемелердегі былықтарды жойыңдар, айтыңдар" дегеніне мен Келес аудандық Абай ауруханасындағы мамандандырылған емхананың хирург бөлмесінде аурухана басшылығы тарапынан берілген сапасы жағынан өте төмен бір реттік стерильді емес қолғаптарды видеоға түсіріп фейсбук желісіне салғаным сол еді, бас дәрігер А.Бексұлтанованың 30 маусым күнгі бұйрығымен жұмыстан шығарылдым. Мұның қаншалықты заңды екенін өзім түсінбей отырмын", - дейді Сейдуәлиев.

Еске сала кетейік, бұған дейін Түркістан облысында жұмысынан босатылған мектеп директоры жанайқайы жайлы жазған едік.

Мақаланың түпнұсқасы: https://kaz.nur.kz/society/1863072-trkistan-oblysynda-medicinalyk-kolgapty-sapasyn-synagan-hirurg-zmystan-bosatyldy/

pixel