Қапыда қаза болған қазақстандық журналистер кімдер?

Талантымен талайды тамсандырып, телеарна, БАҚ беттерінде өзіндік еңбегімен көзге түскен қазақстандық журналистер жетіп артылады. Өкініштісі, олардың кейбірінің ғұмыры тым қысқа болып, жұлдыздай жарқ етіп сөнген еді. NUR.KZ назарларыңызға қапыда қаза болған қазақстандық журналистердің тізімін ұсынады.

2009 жылы жол-көлік оқиғасынан қаза болған таланатты журналистердің бірі – Руслан Бөлебай. Ол әл-Фараби атындағы Қазақ ұлттық университетінің журналистика факультетін бітіріп, студент шағынан бастап өз мамандығы бойынша шеберлігін шыңдай бастайды. Қызылорда облысы Шиелі ауданында дүниеге келген ол, небары 24 жасында өмірмен қош айтысады. Руслан Бөлебайды көрермендер келбеті келісті, білікті тележүргізуші, таланатты әнші ретінде жақсы таниды.

"Қазақстан" ұлттық телеарнасының спорт жаңалықтарын жүргізуші ретінде көпшілікке танылған – Асылхан Өмірбекұлы да өмірден ерте өтті. Қатерлі дертке шалдыққан таланатты журналист 2016 жылы қайтыс болған еді.

Қазақстандық көрермендер қапыда көз жазып қалған тағы бір журналист – ақтөбелік Айзат Әбдісамат болды. Жас журналист биыл сәуір айында лифтіге жаншылып, қаза тапқан еді. Марқұмның соңында бір қызы қалды.

Ұлттық университеттің журналистика факультетін тәмамдап, өз елі – Ауғанстанға барып қаза болған журналистердің қатарында Саид Самим Фарамарз да бар. 27 жасында бақилық болған ол, әлемнің жеті тілін меңгерген білікті маман еді. Қазақстанда төрт жыл бойы оқыған журналист қазақ тілін де жетік меңгеріп алған екен.

Қайғылы жағдайда қаза болған журналистердің қатарында NUR.KZ порталының тілшісі – Ирина Бекетова да бар. Ол отбасылық жанжалдың салдарынан, қыркүйек айының 25-інде өз үйінің ауласында қаза болған еді.

Күні кеше ғана қазақ елі тағы бір талантты қыздарымен қош айтысты. 27 жастағы Әйгерім Мұсаева үйінен шығып кетіп, отбасына қайта оралмаған еді. Кейін оны поезд қағып өлтірген белгілі болды. Продюсер әрі журналистің соңында жолдасы мен екі баласы қалды.

Мәтіннен қате тапсаңыз, бізге жазыңыз