Мақтааралда 620 үй су астында қалған (фото)

Түркістан облысы Мақтаарал ауданында төрт ауылда сел салдарынан 620 тұрғын үй су астында қалған деп хабарлайды KAZ.NUR.KZ.

Өзбекстандағы су қоймасы бөгетінің жарылуы салдарынан Жаңатұрмыста 46 үй, Фирдоуси 250 үй, Жеңіс 130 үй,  Өргебас ауылында 194 үй жапа шеккен. 22 эвакуациялық орынға 7000-ға жуық тұрғын орналастырылған.

Қауіпсіз жерге көшірілген тұрғындарды 120 медицина қызметкерлері тексеруден өткізіп жатыр.

"Полиция қызметкерлері Жеңіс, Жаңатұрмыс, Фирдоуси, Өргебас елімекендеріне 5 блок-бекет қойып, қауіпсіздікті қамтамасыз етуде. Сонымен қатар, көршілес Жетісай ауданы, Қоғалы елдімекенінде қауіпсіздікті күшейту мақсатында 5 техника, 508 адам жұмылдырылған. Жағдай тұрақты бақылауда, барлық қажетті көмек уақытылы көрсетілуде, " - деп хабарлайды Түркістан облысы өңірлік коммуникация қызметі.

Айта кетейік, бірінші мамыр күні Өзбекстандағы Сардоба су қоймасының бөгеті жарылып, салдарынан Түркістан облысы Мақтаарал ауданындағы екі ауылды су басты. Бүгін таңғы сағат 08:00-де су Өргебас ауылына да жеткен.

Орын алған оқиғаға байланысты Мақтаарал ауданында төтенше жағдай жарияланды.

Бұл тұрғыда Қасым-Жомарт Тоқаев Шавкат Мирзиеевке қоңырау шалып, оқиға зардаптарын талқылаған болатын.

Ең маңызды әрі қызықты жаңалықтарды біздің Instagram парақшамыздан оқыңыздар>>

Мәтіннен қате тапсаңыз, бізге жазыңыз