Алматыда такси көлігі апатқа ұшырап, төрт адам зардап шекті (фото)

Кеше, 6 қаңтар күні оңтүстік астанада такси көлігі апатқа ұшырады. Оқиға салдарынан 4 адам зардап шекті, деп хабарлайды KAZ.NUR.KZ тілшісі.

Sputnik Қазақстан дерегінше, куәгерлер Hyundai Sonata таксиінің рөліндегі қыз Жетісу ауданындағы орталық көшеде кетіп бара жатқанын айтқан. Ол "Первомайская автобаза" маңында кері бұрылған. Сол уақытта бір бағыттағы "ВАЗ-2114" көлігі соқтығысудан қашып, тежегішті басқан. Ақырында көліктер соқтығысып, "ВАЗ-2114" Hyundai Sonata көлігіне кіріп кеткен. Соққыдан көліктер бірнеше метр алға ұшқан.

Жол апаты салдарынан 4 адам зардап шекті. Оның қатарында такси рөлінде отырған қыз бен "ВАЗ-2114" үш жолаушысы бар. Ауруханаға тек үш адам жүгінді. Hyundai жүргізушісі медицина қызметкерлеріне қаралып, ауруханаға жатудан бас тартты.

Оқиға орнында полицейлер жұмыс істеуде. Олар жол апатының мән-жайын анықтап жатыр.