АҚШ-та Қазақстан азаматшасы оқ жарақатынан қайтыс болды

АҚШ-та Қазақстан азаматшасы оқ тиіп, қаза болған. Бұл ақпаратты еліміздің Сыртқы істер министрлігі растады, деп хабарлайды ҚазАқпарат.

"Осы жылдың 16 ақпанында Миннесота штатының Сент-Пол қаласында Қазақстан Республикасының азаматы белгісіз жағдайда қаза тапты. Жергілікті полиция берген ақпаратқа сәйкес, отандасымыз өз көлігінде оқ жарақатынан көз жұмған", - дейді министрліктен.

Ведомствоның мәліметінше, полиция осы оқиға бойынша тергеу жүргізіп жатыр. Қылмыс жасады деген күдікті қамауға алынған.

"Қазақстан Республикасының консулы марқұмның туыстарымен тұрақты байланыста", - деп қосты ведомстводан.

Қазақпараттың мәліметінше, оқ жарақатынан мерт болғандар туралы ақпарат тарататын gunmemorial сайтында қайтыс болған азаматшаның 34 жастағы Юлия Ли екендігі айтылған.