Шымкентте трансформатор жанып кетті: 400-ден астам адам жарықсыз қалды

Шымкентте трансформатор жанып кетті. Соның салдарынан 413 тұтынушы электр қуатынан ажыратылды, деп хабарлайды KAZ.NUR.KZ тілшісі қалалық төтенше жағдайлар департаментінің Instagram желісіндегі парақшасына сілтеме жасап.

Өрт 28 маусым күні күндіз болған.

Ведомство мәліметінше, Шоқан Уалиханов көшесінде орналасқан трансформатор толығымен жанып кеткен. Өрттің аумағы 50 шаршы метрді құрады.

Тілсіз жау сағат 16:11-де оқшауланып, 16:26-да толығымен сөндірілді.

Абырой болғанда, өрттен зардап шеккендер мен қайтыс болғандар жоқ.

Қазіргі уақытта оның шығу себебі анықталып жатыр.

Оқиға орнында төтенше жағдайлар департаментінің 12 қызметкері мен 3 техникасы жұмыс істеген.

Айта кетейік, өрттің салдарынан 413 тұтынушы электр қуатынан ажыратылды.

Мақаланың түпнұсқасы: https://kaz.nur.kz/accidents/1976104-symkentte-transformator-zanyp-ketti-400-den-astam-adam-zaryqsyz-qaldy/