Абай облысында өрт сөндіруші қызметтік борышын орындау кезінде қаза тапты

Абай облысында өрт сөндіруші қызметтік борышын орындау кезінде қаза тапты, деп хабарлайды Төтенше жағдайлар министрлігінің баспасөз қызметі.

Министрлік Айдос Тоғызбаевтың туған-туыстары мен жақындарына қайғыра көңіл айтады.

"Айдос өз ісінің маманы ретінде әріптестердің есінде мәңгі қалады. ТЖМ қайтыс болған өрт сөндірушінің отбасына жан-жақты көмек пен қолдау көрсетеді. Абай облысы ТЖ департаментінің психологтары өрт сөндірушінің туыстарына көмек көрсетуде", - делінген хабарламада.

Ведомство мәліметінше, 2022 жылдың 7 қыркүйегінде 112 кезекші пультіне Абай облысы Жарма ауданының Бозжыра ауылдық округі Бірінші ауылының учаскесінде құрғақ шөп жанып жатқаны туралы хабарлама келіп түскен.

Шақыру орнына №22 өрт сөндіру бекетінің қызметкерлері жіберілді. Олардың арасында Айдос Тоғызбаев та болған. Төтенше жағдайлар департаментінің қызметкерлері дереу өртті сөндіруге кіріскен.

Қызыл жалынды ауыздықтау кезінде өрт сөндіру автоцистернасы Бақыршық тау-кен өндіру кәсіпорнының өрт сөндіруге су жеткізетін КАМАЗ (12 текше метр) су алды. Осы кезде жел бағытының өзгеруі салдарынан өрт автоцистернаға қарай аумақты шарпыды. Техникаға арналған эвакуациялау жолдары барлық жағынан отқа оранып, биіктігі екі метр қараған ағашы өртенді.

Өрт сөндірушілер жағдайды бағалап, өрт-техникалық қару-жарақты жинауды тоқтатып, шұғыл эвакуациялауға кірісті. Автоцистерна мен КАМАЗ су тасымалдаушы көлігі толығымен жанып кетті.

"Салдарынан өрт сөндіру бекетінің бөлімше командирі Амангелді Тұрлыбеков пен өрт сөндіру бекетінің жүргізуші-қызметкері Айдос Тоғызбаев, өрт сөндіруші-құтқарушы Нұрлан Салимжан түрлі дәрежедегі күйік алып, Жарма ауданы Шар қалалық ауруханасына жатқызылды", - делінген хабарламада.

Айдос қатты күйік алып, жарақатынан ауруханада көз жұмды.

Қызметтік борышын орындау кезінде көрсеткен батылдығы мен жанқиярлық ерлігі үшін азаматтық қорғау сержанты Айдос Ерұланұлы Тоғызбаев қаза тапқаннан кейін ІІІ дәрежелі "Айбын" мемлекеттік наградасына ұсынылды.

"Айдос 36 жаста еді. Азаматтық қорғау органдарында 2019 жылдан бастап қызмет еткен. Оның артында әйелі мен 5 баласы қалды", - деді Төтенше жағдайлар министрлігі.

Айта кетейік, Өрт аумағы 500 га құрады, өрт 8 қыркүйекте сағат 5.40-та сөндірілді. Өртті сөндіруге Төтенше жағдайлар департаменті мен жергілікті атқарушы органдардың жеке құрамынан 14 адам мен 5 бірлік техника жұмылдырылды.

Қазіргі уақытта оқиғаның мән-жайы анықталуда.