Екібастұзда 59 жастағы әйелді көлік қағып кетті

Павлодар облысында жол-көлік оқиғасынан 59 жастағы әйел көз жұмды, деп хабарлайды Polisia.kz Telegram-дағы ресми жаңалықтар арнасында.

Полицияның хабарлауынша оқыс оқиға 23 желтоқсан, жұма күні таңертең болған.

"Сағат 10.45-те жүргізуші "ВАЗ-217030" маркалы автокөлікті басқара отырып, Екібастұз қаласындағы Қ.Нұралин көшесімен жүріп келе жатып, жолдан белгісіз жерде өтіп бара жатқан жаяу жүргіншіні қағып кетті", — делінген хабарламада.

Жол - көлік оқиғасы салдарынан 59 жастағы әйел адам алған жарақаттарынан оқиға орнында көз жұмды.

"Осы факті бойынша тексеру жүргізілуде. Автокөлік арнайы айыппұл тұрағына қойылды. Тиісті сараптамалар тағайындалды", — деп хабарлады Павлодар облысы ПД баспасөз қызметі.