Желіде жол бойында жанжалдасқан көлік жүргізушілерінің видеосы қызу талқыға түсті

Куәгерлер Алматыдағы Әл-Фараби даңғылында Mercedes Gelandewagen және Chevrolet Cobalt көліктерінің жүргізушілері арасындағы жанжалды камераға түсіріп алған. Оқиғаға қатысты полиция түсініктеме берді.

Видео Instagram-дағы almaty_kris_p аккаунтында жарияланған. Кадрлардан Chevrolet жүргізушісі шеткі сол жақ жолақпен келе жатқанын көруге болады, бір кезде оны екі қара Mercedes көлігі қуып жетіп, жүргізушіге белгі беріп жол беруді сұраған. Алайда Mercedes көлігінің жүргізушілері жол бермей, авариялық жағдай тудырған.

"Құқық бұзушыларға қатысты әкімшілік хаттама толтырылды. 1990 жылы туған К есімді азамат әкімшілік құқық бұзушылық кодексінің 606-бабының 1-бөлігі бойынша және 1993 жылғы К есімді азамат 595-бабының 1-бөлігі бойынша жауапкершілікке тартылады. Оларға жол қозғалысы ережелерін сақтау бойынша құқықтық түсіндіру жұмыстары жүргізілді", - делінген хабарламада.

Айта кетейік, әкімшілік құқықбұзушылық кодексінің 606-бабында: "жол жүрiсiне қатысушының авариялық жағдай туғызуға әкеп соққан, яғни жол жүрiсiне басқа да қатысушыларды жүру жылдамдығын, бағытын күрт өзгертуге мәжбүр етiп, жол жүрiсi қағидаларын бұзу он айлық есептiк көрсеткiш мөлшерiнде айыппұл салуға әкеп соғады", - делінген.

Ал аталған кодекстің 595-бабы бойынша, жол жүрісі қағидаларының жүру, қайта ауыстыру, бұрылу, кері бұрылу немесе тоқтау алдындағы сигнал беру талабын орындамаған жағдайда бес айлық есептік көрсеткіш мөлшерінде айыппұл салынатыны айтылған.