Алматыдағы мектептердің бірінде 9-сынып оқушысы бұрыш баллонын шашып, жеті бала ауруханаға түсті

Алматыдағы мектептердің бірінде 9-сынып оқушысы үзіліс кезінде бұрыш баллонын шашып, салдарынан жеті оқушы ауруханаға жеткізілді, деп хабарлайды Ішкі істер министрлігі Telegram-дағы ресми арнасында.

Полицияның мәліметінше, оқиға бүгін, 29 наурызда болған.

"Алматы қаласы полиция департаментінің Жедел басқару орталығына Алмалы ауданындағы жалпыға білім беретін мектептердің бірінде 9-сынып оқушысы, қоңырау уақытында дәретханада бұрыш баллонын шашып, салдарынан жанында тұрған оқушыларға кері әсері туындағаны туралы хабарлама келіп түскен", - делінген ведомство хабарламасында.

ІІМ мәліметінше, бұл жайттан кейін мектептің 7 оқушысы медициналық көмек көрсету үшін ауруханаға жеткізілген.

Сондай-ақ ведомство Алмалы аудандық полиция басқармасы оқушының ата-анасына қатысты әкімшілік құқықбұзушылық туралы кодекстің 127-бабына сәйкес шара қолданатынын атап өтті.

Сонымен қатар материал кәмелетке толмағандардың істері жөніндегі комиссияның қарауына жіберілетіні белгілі болды.